CM రేవంత్ పర్యటన ముందు నాగర్‌కర్నూల్‌లో బీఆర్ఎస్ నేతల నిర్బంధం

నాగర్‌కర్నూల్ జిల్లాలో సీఎం రేవంత్ రెడ్డి పాలమూరు-రంగారెడ్డి ప్రాజెక్టు సందర్శన నేపథ్యంలో, పోలీసులు బీఆర్ఎస్ నేతలను నిర్బంధించిన ఘటనలు చోటు చేసుకుంటున్నాయి. తెలకపల్లి మండలంలో బీఆర్ఎస్ నాయకుడు శివశంకర్‌తో పాటు మరో 10 మందిని పోలీసులు అదుపులోకి తీసుకున్నారు.

బీఆర్ఎస్ నాయకులు ఈ చర్యలను అక్రమ నిర్బంధాలుగా అభివర్ణిస్తున్నారు. ప్రాజెక్టు పనులు ఆలస్యంపై ప్రశ్నించకుండా ముందస్తు నిరోధక చర్యలే ఈ నిర్బంధాలకు కారణమని వారు ఆరోపిస్తున్నారు. నిన్న మీడియాతో మాట్లాడుతూ, ప్రాజెక్టు నిర్ణీత గడువులో పూర్తికాకపోతే సీఎం పర్యటనకు అడ్డుకుంటామని బీఆర్ఎస్ నేతలు హెచ్చరించారు.

పాలమూరు-రంగారెడ్డి ఎత్తిపోతల పథకాన్ని కేసీఆర్ హయాంలో 90% మేర పూర్తి చేయగా, గత రెండున్నరేళ్లలో మిగతా పనులు నత్తనడకన సాగుతున్నాయని బీఆర్ఎస్ విమర్శిస్తోంది. ఈ నేపథ్యంలో మాజీ ఎమ్మెల్యేలు, మాజీ మంత్రులు ప్రాజెక్టు పూర్తి కోసం పాదయాత్రకు సిద్ధమవుతున్నారు.

అయితే ఈ నిర్బంధాలు తమ పోరాటాన్ని నిలువరించలేవని, రైతులకు న్యాయం జరిగేదాకా ఎలాంటి త్యాగానికైనా సిద్ధమేనని బీఆర్ఎస్ నేతలు స్పష్టం చేశారు. సీఎం రేవంత్ రెడ్డి ఈరోజు సాయంత్రం సోమశిల ప్రాజెక్టుకు చేరుకుని పురోగతిని సమీక్షించనున్నారు.