సర్వేపై నిర్లక్ష్యంగా ఉన్న ఎమ్మెల్యేలకు సీఎం రేవంత్ హెచ్చరిక

తెలంగాణ ముఖ్యమంత్రి రేవంత్ రెడ్డి ప్రస్తుతం కొనసాగుతున్న సర్వేపై ఎమ్మెల్యేల పనితీరుపై తీవ్ర అసంతృప్తి వ్యక్తం చేశారు. నిర్లక్ష్యంగా వ్యవహరిస్తే ఇంచార్జ్ బాధ్యతల నుంచి తొలగిస్తామని హెచ్చరించారు.

ఈ రోజు కాంగ్రెస్ ఎంపీలు, ఎమ్మెల్యేలు, పార్లమెంటరీ ఇంచార్జీలతో జూమ్ మీటింగ్ నిర్వహించిన ఆయన, వారం రోజుల్లో ఎమ్మెల్యేలు తమ తీరు మార్చుకోకపోతే వారి స్థానంలో మరింత క్రియాశీలంగా ఉన్న వారిని ఇంచార్జులుగా నియమిస్తామన్నారు. పార్టీ కోసం పనిచేయకపోతే వారు అవసరం లేదని స్పష్టం చేశారు.

సర్వే విషయంలో సరిగ్గా వ్యవహరించలేకపోతే పేద ప్రజలకు అన్యాయం జరుగుతుందని, పేదల ఓట్లు కోల్పోతే ఆధార్, రేషన్ కార్డు కూడా ప్రభావితమవుతాయని వివరించారు. గ్రామాల్లో విస్తృతంగా అవగాహన సదస్సులు నిర్వహించి, సర్వేపై ప్రచారం చేయాలని ఆదేశించారు.

ఏఐసీసీ ఇంచార్జ్ మీనాక్షి నటరాజన్ మాట్లాడుతూ, నిరక్షరాసులైన పేద, గ్రామీణ ప్రజలకు సర్వేపై అవగాహన కల్పించాలని, ఓటును కాపాడాలని కార్యకర్తలకు సూచించారు. గ్రామాల్లో టెంట్లు వేసి 2002, 2025 ఓటర్ లిస్టులను మ్యాపింగ్ చేయాలన్నారు. అవసరమైతే ఇంచార్జ్ మంత్రులను కూడా మారుస్తామని రేవంత్ హెచ్చరించారు.