హైదరాబాద్ మెట్రో విస్తరణ ఆలస్యంపై సీఎం రేవంత్ కేంద్రానికి లేఖ

హైదరాబాద్ మెట్రో రైలు విస్తరణ (ఫేజ్-2) ప్రాజెక్టును వేగవంతం చేయాలని తెలంగాణ ముఖ్యమంత్రి రేవంత్ రెడ్డి కేంద్రానికి లేఖ రాశారు. మెట్రో ఫేజ్-1 స్వాధీనం, ఫేజ్-2 డిపిఆర్ల ఆమోదంలో జాప్యం పట్ల ఆయన ఆందోళన వ్యక్తం చేశారు.

కేంద్ర పట్టణాభివృద్ధి శాఖ మంత్రి మనోహర్ లాల్ ఖట్టర్, కేంద్ర మంత్రి కిషన్ రెడ్డిలకు రాసిన లేఖలో సీఎం ఈ మేరకు పేర్కొన్నారు. ఇటీవల ఢిల్లీలో జరిగిన సమావేశంలో తీసుకున్న నిర్ణయాల అమల్లో జాప్యం జరుగుతోందని చెప్పారు.

ఫేజ్-1 స్వాధీన ప్రక్రియ త్వరగా పూర్తి చేయకపోతే మెట్రో నిర్వహణపై అనిశ్చితి నెలకొంటుందని హెచ్చరించారు. ఫేజ్-2 కు సంబంధించిన డిపిఆర్ల ఆమోదం, నిధుల సమీకరణ లాంటివి ఆలస్యం కావడం వల్ల ప్రాజెక్టు వ్యయం పెరిగే ప్రమాదం ఉందని ఆయన ఆందోళన వ్యక్తం చేశారు.

మెట్రో ఫేజ్-2 ను వేగవంతం చేయడానికి ఎస్బిఐ క్యాపిటల్స్ సంస్థకు వెంటనే బాధ్యతలు అప్పగించాలని కేంద్రాన్ని కోరారు. హైదరాబాద్ నగర రవాణా అభివృద్ధికి మెట్రో విస్తరణ కీలకమని పేర్కొన్నారు. కేంద్రం, రాష్ట్ర ప్రభుత్వాలు సమన్వయంతో ముందుకు సాగాలని సూచించారు. కేంద్రం స్పందనపై ఇంకా సమాచారం రాలేదు.