తెలంగాణ GST రాబడి పెంపుకు AI వినియోగంపై CM రేవంత్, ఆర్థికవేత్త సుబ్రహ్మణ్యన్ చర్చలు

హైదరాబాద్ లోని బోధి పవిలియన్ లో ముఖ్యమంత్రి రేవంత్ రెడ్డి, ఆర్థికవేత్త అరవింద్ సుబ్రహ్మణ్యన్ ఈరోజు సమావేశమయ్యారు. రాష్ట్ర GST రాబడి పెంచడంలో AI టెక్నాలజీని ఉపయోగించే మార్గాలపై చర్చించారు.

GST వ్యవస్థలో లీకేజీలను అరికట్టేందుకు, వివిధ ప్రభుత్వ శాఖల మధ్య AI ఆధారిత సమన్వయం అవసరమని సుబ్రహ్మణ్యన్ సూచించారు. మున్సిపల్, RERA, పంచాయతీరాజ్, విద్యుత్, వాణిజ్య పన్నుల శాఖల డేటాను సమీకృతం చేయడం ద్వారా ఆదాయ లీకేజీలను నివారించవచ్చని వివరించారు.

భవన నిర్మాణ అనుమతుల దరఖాస్తు దశలోనే నిర్మాణ సామగ్రి, పన్నుల అంచనాలను నమోదు చేసి, ట్యాక్స్ ఎగవేతను తగ్గించే అవకాశం ఉందని తెలిపారు. మీసేవ, ఆరోగ్యశ్రీ, CM రిలీఫ్ ఫండ్ వంటి సేవల వివరాలను కూడా సమీకృతం చేస్తే ప్రయోజనకరంగా ఉంటుందని CM రేవంత్ రెడ్డి అన్నారు.

ఏఐ టూల్స్ ను వాడుతూనే వ్యాపారాలకు ఎలాంటి ఇబ్బందులు లేకుండా ఈజ్ ఆఫ్ డూయింగ్ బిజినెస్ మెరుగుపరచాలని సీఎం పేర్కొన్నారు. తెలంగాణ ప్రభుత్వం GST రాబడి పెంచుకునే దిశగా ఎక్సైజ్, GST శాఖల్లో సంస్కరణలపై కూడా దృష్టి సారించింది.