అభిషేక్ బెనర్జీపై దాడిపై స్పందించని టీఎంసీ నేతలు: సస్పెండ్ లీడర్ రిజు దత్తా తీవ్ర విమర్శలు

సస్పెండ్ చేయబడిన తృణమూల్ కాంగ్రెస్ (టీఎంసీ) నేత రిజు దత్తా, పార్టీ జాతీయ ప్రధాన కార్యదర్శి, మమతా బెనర్జీ మేనల్లుడు అభిషేక్ బెనర్జీపై సోనార్పూర్‌లో జరిగిన దాడి ఘటనపై తన సొంత పార్టీ నాయకత్వాన్ని తీవ్రంగా ప్రశ్నించారు. ఈ దాడిని రాహుల్ గాంధీ, మల్లికార్జున ఖర్గే, కపిల్ సిబల్, ఆదిత్య ఠాక్రే, అఖిలేశ్ యాదవ్ వంటి పలువురు ప్రతిపక్ష నేతలు ఖండిస్తూ ట్వీట్ చేశారు. కానీ టీఎంసీకి చెందిన 80 మంది ఎమ్మెల్యేలు, 42 మంది ఎంపీలు ఒక్కరు కూడా ట్వీట్ చేయలేదని, ఆసుపత్రిలో చికిత్స పొందుతున్న అభిషేక్‌ను పరామర్శించేందుకు ఎవరూ రాలేదని దత్తా ఆగ్రహం వ్యక్తం చేశారు.

'దాడి జరిగిన ప్రాంతంలో టీఎంసీ ఎంపీ ఉన్నారు. కానీ ఆమె అపోలో, బెల్వ్యూ ఆసుపత్రికి రాలేదు. కోల్‌కతాలో ఉన్న స్థానిక ఎంపీలు, ఎమ్మెల్యేలు ఎక్కడున్నారు?' అని ఆయన నిలదీశారు. గత 25 రోజులుగా పార్టీ ఏమీ చేయలేదని, ఇప్పుడు రోడ్డుపైకి దిగడం చాలా ఆలస్యమని అన్నారు. ఒకవేళ మమతా-అభిషేక్ లు 5వ లేదా 6వ తేదీనే వీధిలోకి దిగి ఉంటే 20,000 మంది కార్యకర్తలు వెంట నడిచేవారన్నారు.

పోలీసులు అరెస్ట్ చేసిన 5-6 మంది గతంలో టీఎంసీ నుండి వెళ్లిపోయిన వారేనని దత్తా పేర్కొన్నారు. బీజేపీ నేతలే టీఎంసీ కార్యకర్తలను కాపాడి, వారి పార్టీ కార్యాలయాలు తిరిగి ఇచ్చారని, ఈ కారణంగానే కార్యకర్తలు విసుగు చెంది టీఎంసీని వీడుతున్నారని విమర్శించారు. దత్తా వ్యాఖ్యల నేపథ్యంలో టీఎంసీలో అంతర్గత చీలికలు బయటపడుతున్నాయి. సస్పెండ్ లీడర్ చేసిన ఈ తీవ్ర ఆరోపణలపై పార్టీ అధిష్టానం నుండి ఎటువంటి స్పందన రాలేదు.