ఖమ్మం జిల్లాలో రోడ్డు కుంగిపోవడంతో గ్రామాల మధ్య రాకపోకలు నిలిచిపోయాయి

ఖమ్మం జిల్లాలో తిప్పారెడ్డి గూడం, పాతర్లపాడు గ్రామాల మధ్య ఉన్న కలవర్టు కుంగిపోవడంతో రెండు గ్రామాల మధ్య రాకపోకలు నిలిచిపోయాయి.

గోల్తండ నుండి ఆదర్శపేట వరకు కొత్తగా రోడ్డు నిర్మాణం చేపట్టారు. ఈ పనులకు సంబంధించిన మెటీరియల్ తరలించేందుకు వచ్చే భారీ వాహనాలు ఇంధనం ఆదా చేసేందుకు ఈ గ్రామీణ రహదారి ద్వారా ప్రయాణించాయని స్థానికులు చెబుతున్నారు. ఈ రోడ్డు సామర్థ్యాన్ని మించిన లారీలు నిరంతరం ప్రయాణించడంతో కలవర్టు దెబ్బతింది.

దీంతో రైతులు, వ్యవసాయ కూలీల రాకపోకలు ప్రభావితమయ్యాయి. నిత్యం పొలాలకు వెళ్లే వారు తీవ్ర అసౌకర్యం ఎదుర్కొంటున్నారు. అధికారులు వెంటనే స్పందించి శాశ్వత పరిష్కారం చూపాలని స్థానికులు డిమాండ్ చేస్తున్నారు.