బోరుబావులను పునరుద్ధరించే రోబోటిక్ బోర్ చార్జర్ టెక్నాలజీ.. ఖర్చు ₹15,000-20,000 మాత్రమే

పూణేకు చెందిన మెకానికల్ ఇంజనీర్ రాహుల్ బకారే, హైడ్రాలజిస్ట్ వినీత్ ఫడ్నీస్ కలిసి ఎండిన బోరుబావులను పునరుద్ధరించే టెక్నాలజీని అభివృద్ధి చేశారు. వీరు స్థాపించిన ఉబుమ్ ఎన్విరాన్మెంటల్ టెక్నాలజీస్ సంస్థ ఈ సాంకేతికతను 'బోర్ చార్జర్' పేరుతో రూపొందించింది.

దేశంలో వ్యవసాయం సగానికి పైగా భూగర్భ జలాలపై ఆధారపడి ఉంది. సెంట్రల్ గ్రౌండ్ వాటర్ బోర్డ్ రికార్డుల ప్రకారం ఏటా నీటి మట్టం ప్రమాదకర స్థాయికి పడిపోతోంది. నీటి పొరలు సహజంగా రీచార్జ్ కాకపోవడమే అసలు సమస్యని వీరు గుర్తించారు.

ఈ వ్యవస్థలో ముందుగా నిపుణుల బృందం హైడ్రాలజికల్ సర్వే చేస్తారు. భూమి లోపల రాతి పొరలు, నీటి నిల్వ పొరల స్థితిని ఖచ్చితంగా గుర్తిస్తారు. ఆ తర్వాత పేటెంట్ పొందిన రోబోటిక్ పరికరాన్ని బోర్వెల్ లోపలికి పంపుతారు. ఆ పరికరం కేసింగ్ పైపులో కచ్చితమైన లోతులో చిన్న రంధ్రాలు వేస్తుంది. దీంతో వర్షపు నీరు నేరుగా భూగర్భ నీటి పొరల్లోకి ప్రవహిస్తుంది.

సాధారణ పద్ధతిలో భారీ గుంత తవ్వి సిమెంట్ పనులు చేయాల్సి ఉంటుంది. దీనికి లక్షల రూపాయలు ఖర్చవుతాయి. కొన్ని నెలలకే ఆ వ్యవస్థ పూడికి చేరుతుంది. బోర్ చార్జర్ టెక్నాలజీలో ఖర్చు ₹15,000 నుంచి ₹20,000 లోపే ఉంటుంది.

కర్ణాటకకు చెందిన రైతు నబీ సాబ తన పొలంలో ఈ టెక్నాలజీని ఉపయోగించారు. ఆయన బోర్వెల్ నీటి మట్టం 450 అడుగులకు పడిపోయింది. గంట పాటు మాత్రమే నీరు వచ్చేది. బోర్ చార్జర్ వాడిన తర్వాత నీటి మట్టం 150 అడుగులకు పెరిగింది. నీరు నాలుగున్నర గంటల పాటు నిరంతరాయంగా పారుతోంది. ఆయన మామిడి తోట మళ్లీ పచ్చబడింది. ఆదాయం రెట్టింపు అయింది.