భూటాన్ సరస్సు ఉప్పొంగడంతో బెంగాల్, అస్సాంకు ఆకస్మిక వరద ముప్పు

భూటాన్‌లోని గాసా జిల్లాలో ఉన్న షింటాపూర్ సరస్సు రెండు రోజుల క్రితం ఉప్పొంగింది. దీంతో పశ్చిమ బెంగాల్, అస్సాం రాష్ట్రాలకు ఆకస్మిక వరద ముప్పు ఏర్పడింది. ఈ నేపథ్యంలో భారత కేంద్ర జల సంఘం రెండు రాష్ట్రాలకు ప్రత్యేక ముందస్తు హై అలర్ట్ జారీ చేసింది. కేంద్ర హోమ్ శాఖ సమన్వయంతో ఈ హెచ్చరిక ఇచ్చారు.

సరస్సు నుంచి 74 లక్షల క్యూబిక్ మీటర్ల నీరు, బురద, కొండచర్యల వ్యర్థాలు దిగువకు దూసుకొస్తున్నాయి. భూటాన్‌లోని పునత్సాంగ్చు నది ఎగువ ప్రాంతాల నుంచి వచ్చే ఈ భారీ నీరు భారతదేశంలోని సంకోష్ నదిలోకి ప్రవేశిస్తుంది. దీని ప్రభావంతో నదీతీర ప్రాంతాల్లో నీటిమట్టం ఒక్కసారిగా పెరిగే అవకాశం ఉంది.

పశ్చిమ బెంగాల్‌లోని అలీపూర్ దువార్, జల్పాయిగురి, డార్జిలింగ్ కొండ ప్రాంతాలు, కూచ్ బెహార్ జిల్లాలు తీవ్ర ముప్పు పరిధిలో ఉన్నాయి. అస్సాంలోని ధుబ్రీ, కోక్రాఝర్ జిల్లాలకు కూడా ఆకస్మిక వరద హెచ్చరికలు జారీ అయ్యాయి.

అలీపూర్ దువార్ జిల్లాలో సంకోష్ నది పరివాహక ప్రాంతాల నుంచి 12 వేల మందిని అధికారులు సురక్షిత ప్రాంతాలకు తరలించారు. వారి కోసం పాఠశాలలు, కమ్యూనిటీ హాళ్లలో తాత్కాలిక పునరావాస కేంద్రాలు ఏర్పాటు చేశారు. ఆహారం, వైద్య సదుపాయాలను అందిస్తున్నారు.

అత్యవసర పరిస్థితులను ఎదుర్కోవడానికి NDRF, SDRF, Civil Defence బృందాలను సరిహద్దు జిల్లాల్లో మోహరించారు. నదీతీర ప్రాంతాల ప్రజలు అప్రమత్తంగా ఉండాలని అధికారులు సూచిస్తున్నారు.