నెల్లూరులో ఘనంగా రొట్టెల పండగ ప్రారంభం

నెల్లూరు జిల్లాలోని బారాషాహిద్ దర్గా వద్ద ఏటా నిర్వహించే రొట్టెల పండగ ఈ రోజు నుంచి ఐదు రోజుల పాటు ప్రారంభమైంది. అధికారులు అన్ని ఏర్పాట్లు చేశారు.

హిందూ, ముస్లిం సామరస్యానికి ప్రతీకగా ఈ పండగ జరుగుతుంది. దేశంలోని వివిధ ప్రాంతాలు, విదేశాల నుంచి భక్తులు భారీగా తరలివస్తున్నారు. స్వర్ణాల చెరువు భక్తిభావంతో నిండిపోయింది.

పండగ తొలి రోజు సందల్ మాలిక్, 27న గంధ మహోత్సవం నిర్వహిస్తారు. షహీదులకు అమీనా మసీదులో గంధం తయారు చేసి, 12 బిందెల్లో నగరంలో ఊరేగింపుగా తీసుకొచ్చి 12 సమాధులకు లేపణం చేస్తారు. 28న తెల్లవారుజామున ఆ గంధాన్ని స్వర్ణాల చెరువులో కలిపి రొట్టెల పండగను ప్రారంభిస్తారు. 29న తహ తహలీల్ ఫాతిహాతో ఈ వేడుక ముగుస్తుంది.

గత ఏడాది కోరికలు తీరిన భక్తులు ఈ సంవత్సరం రొట్టెలను తెచ్చి అవసరమైన వారికి ఇస్తారు. కొత్త భక్తులు వాటిని చెరువులో పట్టుకుంటారు. ఈ సంప్రదాయం భక్తిశ్రద్ధలతో కొనసాగుతోంది.