బీమా లేని వాహనాలకు డబుల్ ఫైన్లు: తెలంగాణ RTA కొత్త నిబంధన

తెలంగాణలో బీమా లేకుండా వాహనాలు నడిపేవారికి RTA డబుల్ ఫైన్ విధించే కొత్త నిబంధనను అమలు చేస్తోంది. నంబర్ ప్లేట్ ఆధారంగా ఆటోమేటిక్‌గా బీమా వివరాలు గుర్తించే టెక్నాలజీని తనిఖీలకు ఉపయోగిస్తున్నారు.

మొదటిసారి బీమా లేని వాహనం దొరికితే మోటార్ వాహనాల చట్టం సెక్షన్ 196 ప్రకారం రూ.2,000 జరిమానా విధిస్తారు. రెండోసారి పట్టుబడితే ఈ మొత్తం రెట్టింపు అవుతుంది. పదేపదే నిబంధనలు ఉల్లంఘించినా ఇదే నియమం వర్తిస్తుంది.

సుప్రీంకోర్టు ఇటీవల బీమా లేని వాహనాలకు పెట్రోల్ ఇవ్వొద్దని ఆదేశాలు జారీ చేసింది. దేశవ్యాప్తంగా ఈ ఉత్తర్వులను కఠినంగా అమలు చేయాలని సూచించింది. అయితే, పెట్రోల్ పంపుల్లో పూర్తి స్థాయి ఆంక్షలు ఇంకా అమల్లోకి రాలేదు.

బీమా ఉంటే ప్రమాదం జరిగినప్పుడు ఇతరులకు, తన వాహనానికి అయ్యే నష్టం కంపెనీ భరిస్తుంది. లేని పక్షంలో పూర్తి మరమ్మతు ఖర్చు వాహన యజమాని స్వయంగా భరించాల్సి వస్తుంది. రోడ్లపై తిరిగే దాదాపు సగం వాహనాలకు బీమా లేదని అంచనా. తమ వాహనాల బీమా పత్రాలను వెంటనే సరిచూసుకోవాలని అధికారులు సూచిస్తున్నారు.