హైదరాబాద్‌లో స్కూల్ బస్సులపై RTA తనిఖీలు ముమ్మరం

పాఠశాలలు పునర్ప్రారంభం కావడంతో హైదరాబాద్‌లో స్కూల్, కాలేజీ బస్సులపై RTA అధికారులు తనిఖీలు మొదలుపెట్టారు. ఈరోజు నుంచి ఈ తనిఖీలు ప్రారంభమయ్యాయి.

నగరంలోని నాగోల్, ఉప్పల్, రంగారెడ్డి జిల్లా పరిధిలో అధికారులు విస్తృతంగా తనిఖీలు చేపడుతున్నారు. వాహనాల ఫిట్నెస్, ఫైర్ సేఫ్టీ ఏర్పాట్లు, డ్రైవర్ల లైసెన్సులు, కీపర్ల హాజరు వంటి అంశాలను పరిశీలిస్తున్నారు.

గత 15 రోజుల నుంచి రాష్ట్ర ప్రభుత్వం, రవాణా శాఖ ఇచ్చిన హెచ్చరికలు స్కూల్ యాజమాన్యాలు పెద్దగా పాటించలేదు. చాలా వాహనాలు ఫిట్నెస్ నిబంధనలు ఉల్లంఘిస్తున్నట్టు అధికారులు గుర్తించారు. 60 ఏళ్లు దాటిన డ్రైవర్లు పనిచేస్తున్నట్టు కూడా బయటపడింది.

కీపర్లు తప్పనిసరిగా నిర్ణీత డ్రెస్ కోడ్ పాటించాలని, 60 ఏళ్లు పైబడిన డ్రైవర్ల లైసెన్సులు తనిఖీ చేస్తామని అధికారులు స్పష్టం చేశారు. నిబంధనలు ఉల్లంఘించిన బస్సులను సీజ్ చేస్తామని, యాజమాన్యాలపై కేసులు నమోదు చేస్తామని హెచ్చరించారు.

ఈ తనిఖీలు వారం రోజుల పాటు కొనసాగుతాయి. సాయంత్రం వరకు ఎన్ని వాహనాలు సీజ్ చేశారనే విషయంపై క్లారిటీ వచ్చే అవకాశం ఉంది.