రూపాయి పతనంతో విదేశీ విద్యార్థులకు తీవ్ర ఆర్థిక ఒత్తిడి: ఆహారం కోసం యాప్‌లపై ఆధారపడుతున్నారు

భారతీయ రూపాయి విలువ చారిత్రాత్మకంగా క్షీణించడంతో విదేశాల్లో చదువుతున్న విద్యార్థులు తీవ్ర ఆర్థిక ఇబ్బందులు ఎదుర్కొంటున్నారు. ప్రస్తుతం డాలర్‌తో పోలిస్తే రూపాయి 96 మార్క్ దాటింది. త్వరలోనే 100 మార్క్ తాకే అవకాశం ఉంది. దీంతో విదేశాల్లో చదువుకునే విద్యార్థుల రోజువారీ ఖర్చులు విపరీతంగా పెరిగాయి.

లండన్‌లో చదువుతున్న విద్యార్థులు ఆహారం కోసం 'టూగూడ్ టు గో' వంటి యాప్‌లపై ఆధారపడుతున్నారు. సాధారణంగా ఎనిమిది పౌండ్లు ఉండే సాండ్‌విచ్‌లు గడువు తేదీకి కొద్ది గంటల ముందు రెండు మూడు పౌండ్లకు లభిస్తాయి. ఈ యాప్‌లో అవి క్షణాల్లో బుక్ అయిపోతాయి. కింగ్స్ కాలేజీలో మాస్టర్స్ పూర్తి చేసి ఇటీవలే తిరిగి వచ్చిన విద్యార్థి ఇలాంటి పరిస్థితినే ఎదుర్కొన్నారు.

విద్యార్థులు ఖర్చులు తగ్గించుకోవడానికి పార్ట్‌టైం ఉద్యోగాలు చేస్తున్నారు. రైల్వే స్టేషన్లు, డిపార్ట్మెంటల్ స్టోర్స్ లో శుభ్రం చేసే పనులు కూడా చేపడుతున్నారు. రోజుకు ఒకేసారి భోజనం చేస్తూ, కొన్నిసార్లు ఉపవాసాలు ఉంటున్నారు. 10 కిలోమీటర్ల దూరం నడిచే వెళుతున్నారు.

అమెరికాలో చదువుతున్న భారతీయ విద్యార్థులు కూడా ఇలాంటి ఇబ్బందులే ఎదుర్కొంటున్నారు. H-1B వీసా, OPT ప్రోగ్రామ్‌ల భవిష్యత్తుపై అనిశ్చితి వారిని భయపెడుతోంది. యూనివర్శిటీ క్యాంపస్లలో ఉచిత పంపిణీ చేసే కూరగాయలు, పాలు వంటివి తీసుకొని సరిపెట్టుకుంటున్నారు. ఒకే గదిలో ఏడు, ఎనిమిది మంది కలిసి నివసిస్తున్నారు.

ఆర్ధిక ఒత్తిడి వల్ల విద్యార్థులు బరువు కోల్పోతున్నారు, తరచూ అనారోగ్యానికి గురవుతున్నారు. మానసిక ఒత్తిడి, పని భారం కారణంగా చదువుపై దృష్టి పెట్టలేకపోతున్నారు. ఫలితంగా అకడమిక్ మార్కులు దెబ్బతింటున్నాయి. పీహెచ్‌డీ విద్యార్థులు కూడా ఇలాంటి ఆందోళన వ్యక్తం చేస్తున్నారు.

విదేశాలకు డబ్బు పంపే మధ్య తరగతి తల్లిదండ్రులపై ఆర్థిక భారం విపరీతంగా పెరిగింది. ట్యూషన్ ఫీజు, విమాన ఖర్చులు మాత్రమే లెక్కేసి బడ్జెట్ వేసుకున్నా, కరెన్సీ హెచ్చుతగ్గులతో హెల్త్ ఇన్సూరెన్స్, వీసా రెన్యూవల్, చలికాలం దుస్తులు వంటి ఖర్చులు ఊహించని విధంగా పెరిగాయి. రూపాయిలో విద్యా రుణం తీసుకొని డాలర్లు/పౌండ్లలో ఫీజు కట్టాల్సి రావడంతో చివరి సెమిస్టర్‌కు రుణం సరిపోక టాప్‌అప్ లోన్ల కోసం బ్యాంకులు చుట్టూ తిరగాల్సి వస్తోంది.