పుతిన్ కీలక ప్రకటన: చైనాతో కొత్త ఇంధన ఒప్పందం త్వరలో

రష్యా, చైనా మధ్య మరో కీలక ఇంధన ఒప్పందం త్వరలో కుదరనుందని రష్యా అధ్యక్షుడు వ్లాదిమిర్ పుతిన్ ప్రకటించారు. విదేశీ మీడియాతో బ్రీఫింగ్‌లో ఆయన ఈ విషయం వెల్లడించారు. చైనా అధ్యక్షుడు శీ జిన్పింగ్‌తో ఇప్పటికే పలు ద్వైపాక్షిక సమావేశాలు జరిగాయని, రెండు దేశాల ప్రభుత్వాలు, మంత్రిత్వ శాఖలు, ప్రముఖ కంపెనీలు నిరంతరం సంప్రదింపులు జరుపుతున్నాయని పుతిన్ తెలిపారు. ముఖ్యంగా ఇంధన రంగంలో భాగస్వామ్యం మరింత బలోపేతం కానుందని, అతి త్వరలోనే ప్రపంచ ఇంధన రంగానికి శుభవార్త అందించబోతున్నామని చెప్పారు. 'నేను రష్యా-చైనా మధ్య కొత్త ఒప్పందాల గురించి మాట్లాడుతున్నాను' అని పుతిన్ పేర్కొన్నారు.

ఉక్రెయిన్‌పై యుద్ధం కారణంగా పశ్చిమ దేశాలు విధించిన ఆంక్షల నేపథ్యంలో రష్యా తన ఇంధన ఎగుమతులను చైనా, భారత్ వంటి ఆసియా దేశాలకు మళ్లిస్తోంది. చైనా ప్రపంచంలోనే అతిపెద్ద ఇంధన దిగుమతిదారుగా ఉంది. ఇప్పటికే రష్యా నుంచి చైనాకు 'పవర్ ఆఫ్ సైబీరియా' పైప్‌లైన్ ద్వారా సహజ వాయువు సరఫరా జరుగుతోంది. తాజా ఒప్పందం చమురు లేదా అదనపు గ్యాస్ సరఫరాకు సంబంధించినది కావచ్చని విశ్లేషకులు భావిస్తున్నారు. ఈ ఒప్పందం ప్రపంచ ఇంధన ధరలపై ప్రభావం చూపే అవకాశం ఉంది. చైనా-రష్యా వ్యూహాత్మక సహకారం ఇంధన రంగంలో మరింత గట్టిపడనుంది.