యూరోప్ టూర్ ప్యాకేజీ ప్రకటించిన RV Tours: 12 రాత్రులు, ₹3,25,000

RV Tours & Travels సంస్థ 2027 సంవత్సరానికి యూరోప్ టూర్ ప్యాకేజీని ప్రకటించింది. 12 రాత్రులు, 13 రోజుల ఈ ప్యాకేజీ ధర ఒక్కొక్కరికి ₹3,25,000. ఏప్రిల్ 2027లో నాలుగు బృందాలను పంపించాలని కంపెనీ ప్లాన్ చేస్తోంది.

ఈ వివరాలను ఆ సంస్థ ఇంటర్నేషనల్ సేల్స్ మేనేజర్ చంద్రశేఖర్ తెలిపారు. ప్యాకేజీ ప్రయాణం పారిస్‌లో మొదలై రోమ్‌లో ముగుస్తుంది. హైదరాబాద్ నుంచి పారిస్‌కు నేరుగా విమానం లేదు. అందుకే గల్ఫ్ దేశంలో ట్రాన్సిట్ ఉంటుంది. ఇటీనరీలో ఫ్రాన్స్, బెల్జియం, నెదర్లాండ్స్, జర్మనీ, స్విట్జర్లాండ్, లిఖ్టెన్‌స్టీన్, ఆస్ట్రియా, ఇటలీ ప్రదేశాలు ఉన్నాయి. ఆమ్‌స్టర్‌డామ్‌లో రెండు రాత్రులు ఉంటారు.

ఆమ్‌స్టర్‌డామ్‌లోని తులిప్ గార్డెన్స్ ఏడాదిలో 20 నుంచి 25 రోజులు మాత్రమే తెరిచి ఉంటాయని చంద్రశేఖర్ చెప్పారు. అందుకే ఏప్రిల్ నెలలో బృందాలను పంపుతున్నట్టు ఆయన తెలిపారు. గత ఏడాది మూడు బృందాలు వెళ్లాయని, ఈసారి నాలుగు బృందాలను ప్లాన్ చేసినట్టు చెప్పారు.

ప్యాకేజీలో విమాన టికెట్లు, షెంజెన్ వీసా ప్రాసెసింగ్ ఫీజు, హోటల్ బస, కాంటినెంటల్ బ్రేక్‌ఫాస్ట్, ఇండియన్ లంచ్, డిన్నర్ ఉంటాయని కంపెనీ తెలిపింది. పారిస్ నుంచి రోమ్ ఎయిర్‌పోర్ట్ డ్రాప్ వరకు ఒకే లగ్జరీ బస్ ఉంటుంది. ఈఫిల్ టవర్, సీన్ రివర్ క్రూజ్, మినీ యూరప్, తులిప్ గార్డెన్స్, కెనాల్ క్రూజ్, రైన్ ఫాల్స్ బోటింగ్, వెనిస్ బోట్, పిసా టవర్ ఎంట్రీ టికెట్లు కూడా ప్యాకేజీలో ఉన్నాయి. వ్యక్తిగత షాపింగ్ ఖర్చులు మాత్రం ప్యాకేజీలో లేవు.

కంపెనీకి రెండు తెలుగు రాష్ట్రాల్లో 11 బ్రాంచీలు ఉన్నాయి. బెంగళూరులోనూ ఒక బ్రాంచ్ ఉంది.