భీమవరం మావుళ్ళమ్మ ఆలయంలో వెయ్యి మంది మహిళల గీతా పారాయణం

పశ్చిమ గోదావరి జిల్లా భీమవరంలోని మావుళ్ళమ్మ ఆలయ ప్రాంగణంలో సహస్రగళ గీతా పారాయణం జరిగింది. ఈ కార్యక్రమంలో వెయ్యి మంది మహిళా భక్తులు పాల్గొన్నారు.

గణపతి సచ్చిదానంద స్వామి ఆశీసులతో ఈ కార్యక్రమం నిర్వహించినట్టు ఆలయ ధర్మకర్త అరసవల్లి సుబ్రహ్మణ్యం తెలిపారు. భారతదేశంతో పాటు యూరప్ దేశాల్లో కూడా లక్షలాది మంది భగవద్గీతలోని 18 అధ్యాయాలను పారాయణ చేస్తున్నారని ఆయన చెప్పారు. సచ్చిదానంద స్వామి ఆన్లైన్లో గీతా తరగతులు కూడా నిర్వహిస్తున్నారని తెలిపారు.

ప్రతి ఒక్కరిలో నైతిక విలువలు పెరగాలన్న లక్ష్యంతో ఈ కార్యక్రమాన్ని నిర్వహించినట్టు నిర్వాహకులు తెలిపారు. దేశవ్యాప్తంగా గీతా పారాయణం చేయడం వల్ల ప్రజల్లో భక్తి భావం పెరుగుతుందని సుబ్రహ్మణ్యం తెలిపారు. ఆలయ పాలక మండలి, దేవస్థాన అధికారులు, దత్త పీఠ శిష్యులు ఈ కార్యక్రమంలో పాల్గొన్నారు.