సాయికృష్ణ కేసు: ఆధారాల సేకరణపై దర్యాప్తు బృందం దృష్టి

విజయవాడ కృష్ణాలంక పోలీస్ స్టేషన్ లో అదృశ్యమైన సాయికృష్ణ కేసులో దర్యాప్తు బృందం ఆధారాల సేకరణపై దృష్టి సారించింది.

స్టేషన్ లోని సీసీటీవీ ఫుటేజ్ ను బ్యాకప్ చేసి, మంగళగిరి ఎఫ్ఎస్ఎల్ ల్యాబ్ కు పంపించేందుకు అధికారులు సిద్ధమవుతున్నారు. సాయికృష్ణ తల్లి విజయలక్ష్మి తెలిపిన తేదీలకు సంబంధించిన ఫుటేజ్ ను భద్రపరిచారు.

ఆ తేదీల్లో విధుల్లో ఉన్న పోలీస్ సిబ్బందిని విచారించారు. టాస్క్‌ఫోర్స్ పోలీసులు సాయికృష్ణను మార్కాపురం నుంచి విజయవాడకు తీసుకొచ్చినట్లు వెల్లడించడంతో, ఇద్దరు టాస్క్‌ఫోర్స్ కానిస్టేబుళ్లను ఏఎస్పీ దైవప్రసాద్ ప్రశ్నించారు. ప్రస్తుతం అందుబాటులో లేని సిబ్బందిని రేపు ప్రశ్నించనున్నారు.

ఫోరెన్సిక్ బృందం లాకప్ తో పాటు స్టేషన్ లోని ఇతర ప్రదేశాల నుంచి వేలిముద్రలు సేకరించింది. కాల్ డేటా రికార్డులను కూడా పరిశీలిస్తున్నారు.

ఏఎస్పీ దైవప్రసాద్ ఉదయం 10 గంటల నుంచి స్టేషన్ లోనే ఉండి విచారణ కొనసాగిస్తున్నారు. సాయికృష్ణ నివాసానికి వెళ్లిన మరో బృందం తల్లి స్టేట్‌మెంట్ రికార్డ్ చేసింది. సీసీటీవీ ఫుటేజ్, ఫోన్ డేటా, వేలిముద్రలు వంటి ఆధారాలను సేకరించి ఫోరెన్సిక్ పరీక్షలకు పంపించారు.