సాయికృష్ణ కస్టోడియల్ డెత్: నిందితులను అప్రూవర్లుగా మార్చే యోచనలో ఎస్ఐటీ

సాయికృష్ణ కస్టోడియల్ మరణం కేసులో ఎస్ఐటీ కీలక వ్యూహం అమలు చేస్తున్నది. కేసులో ఉన్న కొందరు నిందితులను అప్రూవర్లుగా మార్చడానికి ప్రయత్నిస్తున్నారు.

ఇప్పటికే ఐదుగురిని అరెస్ట్ చేసిన ఎస్ఐటీ మరికొందరిని నిందితులుగా చేర్చనుంది. నిందితులు నిజాలు చెపితే వారికి చట్టపరమైన రక్షణ కల్పిస్తామని ఎస్ఐటీ హామీ ఇచ్చినట్లు సమాచారం. ఈ హామీతో పలువురు సాక్ష్యం చెప్పేందుకు ముందుకొచ్చే అవకాశం ఉన్నది.

రెండు రిపోర్టుల్లో A-4గా పేర్కొన్న నిందితుని వివరాలు వెల్లడి కాలేదు. సురేష్ అనే వ్యక్తి అరెస్ట్ ఇంకా చూపించకపోవడంతో అనుమానాలు తలెత్తుతున్నాయి. కీలక నిందితులు అశోక్, నానిల సీడీఆర్లను ఎస్ఐటీ క్షుణ్ణంగా విశ్లేషిస్తున్నది.

విచారణలో సాయికృష్ణను మార్కాపురం నుంచి తీసుకొచ్చి కృష్ణలంక పోలీస్ స్టేషన్లోని రెండో అంతస్తులో ఉంచినట్లు తేలింది. అప్పుడు ఎవరు అతడిని చిత్రహింసలకు గురిచేశారనే దానిపై దర్యాప్తు కొనసాగుతోంది.

ఎస్ఐటీ రిమాండ్ రిపోర్ట్ ప్రకారం మే 6న 53వ సాక్షిగా పేర్కొన్న వ్యక్తిని ప్రభుత్వ ఆసుపత్రిలో చికిత్సకు చేర్పించారు. ఆ వ్యక్తి ఎవరో ఇంకా తెలియాల్సి ఉంది. ఈ విషయంపై త్వరలో స్పష్టత రావచ్చని భావిస్తున్నారు.