30 రోజులుగా కనిపించకుండా పోయిన చిన్నారి జాహ్నవి; పోలీసులు ముమ్మర గాలింపు

కాకినాడ జిల్లా తుని మండలం సీహెచ్ అగ్రహారంలో 2.5 ఏళ్ల చిన్నారి జాహ్నవి 30 రోజుల క్రితం అదృశ్యమైంది. ఆ రోజు ఇంటి వద్ద ఆడుకుంటున్న సమయంలో కనిపించకుండా పోయింది.

పోలీసులు తెలిపిన వివరాల ప్రకారం, పాప తండ్రి పామాయిల్ తోటలోకి వెళ్లగా తల్లి ఇంటి పనిలో నిమగ్నమైంది. ఈ లోపు చిన్నారి జాడ లేకుండా పోయింది.

గాలింపు చర్యల్లో భాగంగా 40 ఎకరాల పామాయిల్ తోటలు, 200 ఎకరాల కొండ ప్రాంతాలను పోలీసులు, NDRF బృందాలు జల్లెడ పట్టాయి. డ్రోన్ కెమెరాలు, థర్మల్ కెమెరాలు, డాగ్ స్క్వాడ్లను వినియోగించారు. 37 సీసీ కెమెరాల ఫుటేజ్, 7 సెల్ టవర్ల డేటాను విశ్లేషించినా ఎలాంటి కీలక ఆధారం లభించలేదు.

పాపతో పాటు వెళ్లిన పెంపుడు కుక్క మూడు రోజుల తర్వాత ఇంటికి తిరిగి వచ్చింది. కొన్ని రోజులకు అది చనిపోయింది.

ఈ కేసుపై డిప్యూటీ సీఎం పవన్ కళ్యాణ్, హోం మంత్రి అనిత ఆదేశాల మేరకు జిల్లా ఎస్పీ బిందు మాధవ్, డీఎస్పీ ఏబిజి తిలక్ పర్యవేక్షిస్తున్నారు. చిన్నారి ఆచూకీ చెప్పిన వారికి లక్ష రూపాయల నగదు బహుమతి ప్రకటించారు. తునితో పాటు చింతపల్లి, పాడేరు, లంబసింగ్ ఏజెన్సీ ప్రాంతాల్లో పోస్టర్లు అంటించారు.

స్థానికులు, యువత బస్టాండ్లు, రైల్వే స్టేషన్లు, ఆటో స్టాండ్లలో పోస్టర్లు పంపిణీ చేస్తూ గాలింపులో పాల్గొంటున్నారు. తల్లిదండ్రులు భవాని, గణేష్ బిడ్డను క్షేమంగా అప్పగించాలని ప్రజలను వేడుకుంటున్నారు.