ముంబైలో భారీ వర్షాలు: భవనం కూలి 6 మృతి, రెడ్ అలర్ట్ జారీ

మహారాష్ట్రలో గత వారం రోజులుగా కురుస్తున్న భారీ వర్షాల కారణంగా ముంబై నగరం జలదిగ్బంధంలో చిక్కుకుంది. మంగుడ్ ప్రాంతంలోని జనతా నగర్‌లో నిర్మాణంలో ఉన్న రెండు లేదా మూడు భవనాలు కూలిపోయాయి. ఈ ప్రమాదంలో ఆరుగురు మరణించగా, మరికొందరు తీవ్రంగా గాయపడ్డారు.

గాయపడిన వారిని మదన్ మాలవ్య శతాబ్ది ఆసుపత్రికి తరలించారు. ముంబై మేయర్ రీతూ తావ్డే, మహారాష్ట్ర సమాజ్‌వాదీ పార్టీ అధ్యక్షుడు అబూ హష్మీ కలిసి ఆసుపత్రిలో బాధితులను పరామర్శించారు. పలు ప్రాంతాల్లో 20 సెంటీమీటర్లకు పైగా వర్షపాతం నమోదైంది. నవీ ముంబై, అంధేరి, సోపారా, పరేల్, విఖ్రోలి, ఘాట్‌కోపర్ సహా పలు ప్రాంతాలు జలమయమయ్యాయి.

రోడ్డు, రైలు మార్గాల్లో రాకపోకలు స్తంభించాయి. రైలు పట్టాలపై నీరు చేరడంతో రైళ్లు ఆలస్యంగా నడుస్తున్నాయి. ముంబై విమానాశ్రయం నుంచి పలు విమానాలను దారి మళ్లించారు. ముంబై-గోవా హైవేపై వరద నీరు నిలిచి వాహనాల రాకపోకలకు అంతరాయం ఏర్పడింది. కొల్హాపూర్‌లో పంచగంగా నది ప్రమాద స్థాయిని మించి ప్రవహిస్తోంది. పుణేలోనూ భారీ వర్షాలు కురుస్తున్నాయి.

భారీ గాలులకు బాంద్రాలో చెట్టు కూలి పార్క్ చేసిన కార్లు ధ్వంసమయ్యాయి. ఇదే విధంగా కల్వా రైల్వే కాలనీ, బాంద్రా ప్రభుత్వ కాలనీలో చెట్లు కూలాయి. వాతావరణ శాఖ ముంబై, పరిసర జిల్లాలకు మరో 24 గంటలు రెడ్ అలర్ట్ జారీ చేసింది. భారీ నుంచి అతి భారీ వర్షాలు కురిసే అవకాశం ఉందని హెచ్చరించింది. స్కూళ్లు, కాలేజీలకు సెలవు ప్రకటించారు.

ముంబై, పుణే, నాసిక్ ప్రాంతాల ప్రజలు అత్యవసరమైతే తప్ప ప్రయాణాలు చేయొద్దని మహారాష్ట్ర ముఖ్యమంత్రి దేవేంద్ర ఫడ్నవీస్ విజ్ఞప్తి చేశారు. ప్రభుత్వం ప్రతి మూడు గంటలకు మొబైల్ ఫోన్లకు వాతావరణ హెచ్చరికలు పంపుతుందని, వాటిని తప్పక పాటించాలని కోరారు. ముంబై విశ్వవిద్యాలయం ఇవాళ జరగాల్సిన అన్ని పరీక్షలను వాయిదా వేసింది. కొత్త తేదీలను త్వరలో ప్రకటిస్తామని యూనివర్సిటీ సిబ్బంది తెలిపారు.