సింగరేణికి కొత్త బొగ్గు బ్లాక్లు కేటాయించే అవకాశం; కేంద్ర బొగ్గు శాఖ మంత్రి కిషన్ రెడ్డి సమీక్ష

కేంద్ర బొగ్గు శాఖ మంత్రి కిషన్ రెడ్డి శనివారం సింగరేణి భవన్లో సింగరేణి సంస్థ కార్యకలాపాలను సమీక్షించారు. ఈ సందర్భంగా సంస్థ ఉత్పత్తి, ఆర్థిక పరిస్థితి, కొత్త బొగ్గు బ్లాక్ల కేటాయింపుపై చర్చించారు.

తాడిచెర్ల బ్లాక్ 2, కోయగూడెం బొగ్గు బ్లాక్లను సింగరేణికి కేటాయించేందుకు కేంద్రం సూత్రప్రాయంగా నిర్ణయించినట్టు తెలుస్తోంది. వీటి కేటాయింపు కోసం సీఎం రేవంత్ రెడ్డి, డిప్యూటీ సీఎం భట్టి విక్రమార్క ఇప్పటికే కిషన్ రెడ్డిని కలిసి విజ్ఞప్తి చేశారు. మే 20న భట్టి విక్రమార్క ఢిల్లీలో కిషన్ రెడ్డిని కలిసిన అనంతరం మంత్రి సానుకూలంగా స్పందించినట్టు తెలిపారు.

కాగా, కోల్ బెల్ట్ ప్రాంతంలోని ఆరు జిల్లాల బీజేపీ అధ్యక్షులు కూడా కిషన్ రెడ్డిని కలిసి వినతి పత్రం సమర్పించారు. తాడిచెర్ల బ్లాక్ 2, కోయగూడెం బ్లాక్లతో పాటు ఇతర బ్లాక్లను సింగరేణికి కేటాయించి సంస్థను ఆదుకోవాలని కోరారు. నిధుల కొరతతో 40 వేల మంది కార్మికులు, వేలాది మంది కాంట్రాక్ట్ ఉద్యోగుల జీవనోపాధి ప్రమాదంలో ఉందని, కనీస సౌకర్యాలు అందడం లేదని వారు దృష్టికి తెచ్చారు. సింగరేణిలో కేంద్ర ప్రభుత్వానికి 49% వాటా ఉన్నందున చొరవ తీసుకోవాలని బీజేపీ నేతలు అభ్యర్థించారు.

సమీక్ష సమయంలో సింగరేణి సీఎండీ జ్యోతి బుద్ధ ప్రకాష్ బొగ్గు ఉత్పత్తి, రవాణా సవాళ్లను వివరించారు. సంస్థకు సెంట్రల్ పబ్లిక్ సెక్టార్ ఎంటర్ప్రైజెస్ స్టేటస్ తొలగించడంతో అటవీ భూసేకరణలో ఇబ్బందులు ఉన్నాయని తెలిపారు. ఒడిస్సాలోని నైనీ బొగ్గు గనిలో రవాణా సమస్యలను పరిష్కరించేందుకు ఆ రాష్ట్ర ప్రభుత్వంతో మాట్లాడతామని కిషన్ రెడ్డి హామీ ఇచ్చారు. కొత్త గనుల కోసం వేలంలో పాల్గొనాలని, రాబోయే 10-15 ఏళ్ల ప్రణాళిక రూపొందించాలని సూచించారు.

కొత్త బొగ్గు బ్లాక్ల కేటాయింపుపై కేంద్రం త్వరలోనే అధికారిక ప్రకటన చేసే అవకాశం ఉన్నట్లు సమాచారం. ఈ నేపథ్యంలో సింగరేణి భవిష్యత్తుపై కార్మికుల్లో ఆశలు నెలకొన్నాయి.