పిల్లల్లో AI వినియోగం: ఆలోచనా శక్తిపై ప్రభావం, నిపుణుల హెచ్చరికలు

భారతదేశంలో జనరేటివ్ AI టూల్స్ వినియోగం వేగంగా పెరుగుతోంది. ఒక సర్వే ప్రకారం 65% మంది భారతీయులు ఇప్పటికే AI టూల్స్ ఉపయోగిస్తున్నారు. ముఖ్యంగా 9-17 ఏళ్ల మధ్య వయస్సు పిల్లల్లో 86% మంది AI వాడుతున్నట్లు గణాంకాలు చెబుతున్నాయి. 31 సంవత్సరాల లోపు వయస్కుల్లో AI వినియోగం మరింత ఎక్కువగా ఉంది.

పిల్లలు AIపై ఎక్కువగా ఆధారపడడం వల్ల వారి ఆలోచనా శక్తి, సమస్య పరిష్కార సామర్థ్యం తగ్గుతున్నట్లు నిపుణులు హెచ్చరిస్తున్నారు. హోమ్ వర్క్, ప్రాజెక్ట్ లు, ప్రసంగాల తయారీని AI ద్వారానే చేయించుకోవడం వల్ల విమర్శనాత్మక ఆలోచన తగ్గిపోతుందని వారు అంటున్నారు. సందేహాలు వచ్చినప్పుడు గతంలో తల్లిదండ్రులు, టీచర్లను సంప్రదించే పిల్లలు ఇప్పుడు AI చెప్పిందే సరైనదని భావిస్తున్నారు. వీరిలో 72% మంది కంపానియన్ చాట్బాట్లు వాడుతుండగా, 25% మంది ఖాళీ సమయంలో AIతో మాట్లాడుతున్నట్లు సర్వేలో వెల్లడైంది.

శారీరక, మానసిక అభివృద్ధిపై కూడా AI ప్రభావం ఉందని వైద్య నిపుణులు చెబుతున్నారు. ఎక్కువ సమయం స్క్రీన్ల ముందు గడపడంతో పిల్లల్లో కదలిక తగ్గి, కంటి సమస్యలు, నిద్ర ఇబ్బందులు పెరిగే అవకాశం ఉంది. AI కంటెంట్ కాపీ-పేస్ట్ చేయడం వల్ల రాయడం తగ్గి, చేతిరాత స్పష్టత, ఏకాగ్రత, జ్ఞాపకశక్తి క్షీణిస్తున్నాయి.

అయితే AI ను సరిగ్గా ఉపయోగిస్తే మంచి బోధనా సాధనం అవుతుందని నిపుణులు అంగీకరిస్తున్నారు. కొత్త అంశాలు నేర్చుకోవడానికి, భాషలు, కోడింగ్ నేర్చుకోవడానికి AI సహాయపడుతుంది. AI సమాధానాలను కాపీ చేయకుండా అర్థం చేసుకొని, సొంత ఆలోచనతో మెరుగుపరచుకోవాలని వారు సూచిస్తున్నారు. పలు యూరోపియన్ దేశాలు డిజిటల్ నుండి భౌతిక అనుభవ ఆధారిత నేర్చుకోవడం వైపు మళ్లుతున్నాయి. అలాగే కొన్ని దేశాలు 18 ఏళ్ల లోపు పిల్లలకు స్మార్ట్‌ఫోన్ వాడకాన్ని నిషేధిస్తున్నాయి.