విజయవాడ వించిపేటలో తాగునీటి కష్టాలు: దుర్వాసన, రంగు మారిన నీళ్లతో ప్రజల ఆందోళన

విజయవాడ నగరంలోని 54వ డివిజన్ వించిపేట ప్రాంతంలో తాగునీటి సమస్య తీవ్రంగా ఉంది. గత కొన్ని రోజులుగా విజయవాడ నగరపాలక సంస్థ పైపులైన్ ద్వారా అందించే నీరు రంగు మారి, దుర్వాసన వస్తోందని స్థానికులు ఆవేదన వ్యక్తం చేస్తున్నారు.

కలుషిత నీటి కారణంగా ఈ ప్రాంతంలో చిన్నారులు జ్వరాలకు, చర్మ వ్యాధులకు గురవుతున్నారని మహిళలు చెబుతున్నారు. నీటి సరఫరా క్రమం తప్పి, వారానికి ఒకసారి లేదా రెండు వారాలకు ఒకసారి మాత్రమే వస్తున్నట్లు తెలిపారు. నీటిని డ్రమ్ముల్లో నిల్వ చేసుకోవడంతో పురుగులు, ఎర్రటి బ్యాక్టీరియా వంటివి ఏర్పడి, దద్దుర్లు వంటి సమస్యలు వస్తున్నాయని అంటున్నారు.

మూడు సంవత్సరాల క్రితం కొత్త పైపులైన్ వేయడానికి రోడ్డు తవ్వగా అప్పటి నుంచి ఇళ్ల ముందున్న మెట్లు తొలగించడంతో వృద్ధులు, పిల్లలు ఇబ్బందులు పడుతున్నారని స్థానికులు చెప్పారు. రోడ్డు నుంచి ఇళ్లు ఎత్తు పెరిగి, పడిపోయి గాయాలైన ఘటనలు కూడా జరిగాయి.

పదిహేను రోజుల నుంచి ఇదే సమస్య ఎదురవుతోందని, మినరల్ వాటర్ కొనే స్తోమత లేదని నివాసితులు వాపోతున్నారు. అధికారులకు ఫిర్యాదు చేసినా పరిష్కారం లభించలేదని, వెంటనే మంచి నీటి సౌకర్యం కల్పించాలని డిమాండ్ చేస్తున్నారు.