22A భూములపై మాజీ IPS అధికారి ఏబీ వెంకటేశ్వరరావు ఆరోపణలు

సెంటర్ ఫర్ లిబర్టీ చైర్మన్, మాజీ ఐపీఎస్ అధికారి ఏబీ వెంకటేశ్వరరావు తిరుపతి బండారు కాలనీలో ఆస్తి హక్కుల కేంద్రం కార్యాలయాన్ని ప్రారంభించారు. ఈ సందర్భంగా 22A భూముల విషయంలో రైతులకు అన్యాయం జరుగుతోందని ఆరోపించారు.

2010 నుంచి ప్రభుత్వాలు రైతుల భూములను 22A లో పెట్టి వేధిస్తున్నాయని ఆయన పేర్కొన్నారు. 1967లో కంప్యూటరీకరణ పేరుతో రైతుల నుంచి రికార్డులు లాక్కొని ఈనాం భూములను దేవాదాయ శాఖ పద్దుల్లో రాయలేదన్నారు. 2012లో నాగార్జున రెడ్డి ఇచ్చిన తీర్పును సాకుగా చేసుకొని దేవాదాయ శాఖ ఈనాం భూములన్నిటినీ దేవాదాయ భూములుగా తమ పద్దుల్లో నమోదు చేసుకొని సబ్ రిజిస్ట్రార్‌కు పంపించడంతో రిజిస్ట్రేషన్ నిరాకరించారని ఆయన ఆరోపించారు.

2016-17 నుంచి భూముల కంప్యూటరీకరణ సాకుతో కొన్ని లక్షల ఎకరాల రైతు భూములను ఒక్క రాత్రిలో ప్రభుత్వ భూములుగా 22A లో చూపించారని వెంకటేశ్వరరావు చెప్పారు. దీంతో రైతులు దిక్కుతోచని స్థితిలో తిరుగుతున్నారని ఆయన అన్నారు. తమకు ఎలాంటి నోటీసు ఇవ్వకుండా భూములను 22A లో చేర్చినందుకు, వాటిని షరతులు లేకుండా తిరిగి అప్పగించాలని ఆయన డిమాండ్ చేశారు.

ఈ వ్యాఖ్యలపై ప్రభుత్వం నుంచి ఎటువంటి స్పందన లభించలేదు.