మూసీ డెవలప్మెంట్పై సీఎం రేవంత్ రెడ్డి సమీక్ష; తొలి దశకు రూ.7,345 కోట్లు

ముఖ్యమంత్రి రేవంత్ రెడ్డి మూసీ నది ఫ్రంట్ డెవలప్మెంట్ ప్రాజెక్టుపై ఉన్నత స్థాయి సమీక్ష నిర్వహించారు. తొలి దశ పనులకు రూ.7,345 కోట్ల వ్యయంతో ఇటీవల మంత్రివర్గం ఆమోదం తెలిపింది.

మొదటి దశలో హిమాయత్ సాగర్ నుంచి బాపుఘాట్ వరకు సుమారు 20 కిలోమీటర్ల మేర అభివృద్ధి చేయనున్నారు. బాపుఘాట్ పరిసరాల్లో నిర్మించే గాంధీ సరోవర్ ప్రాజెక్టు కోసం 83 ఎకరాల రక్షణ శాఖ భూమిని కేంద్రం ఇటీవల బదిలీ చేసింది. రక్షణ మంత్రి రాజ్నాథ్ సింగ్ ఈ బదిలీకి ఆమోదం తెలిపారు.

ప్రాజెక్టు కోసం భూములు ఇచ్చే వారికి మార్కెట్ విలువ ప్రకారం ఆర్థిక పరిహారం అందించనున్నారు. ఇళ్లు కోల్పోయేవారికి నూతన గృహాలు, ఉపాధి అవకాశాలు కల్పించే ఆలోచన ప్రభుత్వం చేస్తోంది. నిర్వాసితుల పునరావాసంపై కీలక నిర్ణయాలు తీసుకోనున్నారు.

గత రెండున్నరేళ్లలో ఈ ప్రాజెక్టు అనేక వివాదాలకు దారితీసింది. బీఆర్ఎస్ పార్టీ సహా ప్రతిపక్షాలు భారీగా నిధులు ఖర్చు చేస్తారంటూ నిరసనలు చేపట్టాయి. అయితే, రాష్ట్ర ప్రభుత్వం వీటిని తోసిపుచ్చింది. మొదటి దశకు రూ.7,345 కోట్లు మాత్రమే ఖర్చవుతుందని, ఇది దశలవారీ ప్రాజెక్టేనని తెలిపింది.

ఈ ప్రాజెక్టుకు నిధులు సమీకరించేందుకు ప్రభుత్వం బ్యాంకుల నుంచి రుణాలు తీసుకోవడంతో పాటు రాష్ట్ర బడ్జెట్ నుంచి కూడా కొంత కేటాయించనుంది. ప్రాజెక్టు పూర్తితో మూసీ నది ప్రాంతాన్ని టూరిజం హబ్గా మార్చాలనేది ప్రభుత్వ లక్ష్యం.