తెలంగాణ: బోనకల్లు మండలంలో 100% సబ్సిడీతో ఇళ్లకు, వ్యవసాయానికి ఉచిత సోలార్ ప్యానెల్స్

తెలంగాణ ప్రభుత్వం ఖమ్మం జిల్లా బోనకల్లు మండలాన్ని మోడల్ సోలార్ మండలంగా ఎంపిక చేసింది. కేంద్ర, రాష్ట్ర ప్రభుత్వాల సంయుక్త ప్రోత్సాహంతో 100% సబ్సిడీతో ఇళ్లకు, వ్యవసాయానికి సోలార్ ప్యానెల్స్ ఏర్పాటు చేస్తోంది.

మండలంలోని 22 గ్రామాల్లో 7,000 గృహాలకు ₹36,000 విలువైన 2 కిలోవాట్ల సోలార్ ప్లాంట్లు ఉచితంగా అమర్చుతున్నారు. మొదటి దశలో 200 యూనిట్ల లోపు కరెంట్ వినియోగించే ఇళ్లకు, వ్యవసాయ మోటార్లకు సోలార్ కనెక్షన్లు ఇస్తున్నారు. ఇప్పటివరకు 80% పనులు పూర్తయ్యాయి.

డిప్యూటీ సీఎం భట్టి విక్రమార్క నియోజకవర్గంలోని బోనకల్లులో ఈ ప్రాజెక్ట్ వేగంగా కొనసాగుతోంది. సోలార్ ప్యానల్స్ వల్ల వినియోగదారులు తమ అవసరాలకు విద్యుత్ వాడుకోవడంతో పాటు మిగిలిన విద్యుత్ను గ్రిడ్కు విక్రయించి ఆదాయం పొందవచ్చు. ప్రభుత్వం యూనిట్కు ₹2.75 చొప్పున నేరుగా బ్యాంక్ ఖాతాల్లో చెల్లిస్తుంది.

మండలంలో 42 మెగావాట్ల సోలార్ విద్యుత్ ఉత్పత్తి అవుతుందని, దీన్ని నిర్వహించేందుకు మూడు కొత్త సబ్స్టేషన్లు మంజూరు చేశామని అధికారులు తెలిపారు. వ్యవసాయ రంగానికి సంబంధించి 2,838 పంపు సెట్లకు 7.5 కిలోవాట్ల సామర్థ్యంతో సోలార్ కనెక్షన్లు ఇస్తున్నారు. 5 హెచ్పి మోటారు కోసం 500 చదరపు గజాల్లో సోలార్ ప్యానెల్ ఏర్పాటు చేస్తారు. ఏడాదికి 12,800 యూనిట్లు ఉత్పత్తి అవుతాయని, అందులో 4,800 యూనిట్లు సాగుకు వినియోగించుకుని మిగిలిన 8,000 యూనిట్లు గ్రిడ్కు విక్రయిస్తే రైతుకు ఏటా ₹20,000 వరకు ఆదాయం వచ్చే అవకాశం ఉందని అధికారులు అంచనా వేశారు.

కేంద్రం అమలు పరుస్తున్న పీఎం కుసుమ కాంపోనెంట్ పథకంతో పాటు రాష్ట్ర ప్రభుత్వం ₹5 లక్షల సబ్సిడీతో సోలార్ పంపు సెట్లు ఉచితంగా అందిస్తోంది. మండలంలో పనులు వేగంగా కొనసాగుతున్నాయి.