సూర్యాపేట జిల్లా పులిచింతల GENCO స్టేషన్‌లో కాంట్రాక్ట్ కార్మికుల ఆందోళన

సూర్యాపేట జిల్లా పులిచింతల GENCO విద్యుత్ ఉత్పత్తి కేంద్రంలో ఈరోజు దాదాపు 70 మంది కాంట్రాక్ట్ కార్మికులను ఒక్కసారిగా తొలగించారు. దీంతో వారు కుటుంబాలతో కలిసి నిరసన చేపట్టారు. ప్రధాన గేటుకు తాళం వేసి ఆందోళనకు దిగారు.

పులిచింతల విద్యుత్ కేంద్రం నిర్మాణం కోసం భూసేకరణ జరిగిన కుటుంబాల నుంచి వీరిని ఎనిమిదేళ్ల క్రితం ఉద్యోగాల్లో తీసుకున్నారు. కాంట్రాక్ట్ ప్రాతిపదికన చాలా తక్కువ జీతానికి పనిచేస్తున్నామని, పర్మనెంట్ చేస్తామని నమ్మించారని, ఇప్పుడు ముందస్తు సమాచారం లేకుండా తొలగించడం అన్యాయమని కార్మికులు ఆరోపిస్తున్నారు.

తొలగింపు వార్త తెలియడంతో కార్మికులు, వారి కుటుంబ సభ్యులు విద్యుత్ కేంద్రం ప్రధాన ద్వారం వద్దకు చేరుకుని తాళం వేశారు. జెన్‌కో, రాష్ట్ర ప్రభుత్వానికి వ్యతిరేకంగా నినాదాలు చేశారు. ఇరిగేషన్ శాఖ మంత్రి ఉత్తమ్ కుమార్ రెడ్డి నియోజకవర్గంలో ఈ ఘటన జరిగింది. ఆయన జోక్యం చేసుకుని సమస్య పరిష్కరించాలని కార్మికులు డిమాండ్ చేస్తున్నారు.

పోలీసులు సంఘటన స్థలానికి చేరుకుని కార్మికులను సముదాయించే ప్రయత్నం చేసినా వారు వెనక్కి తగ్గలేదు. తక్షణం తమను విధుల్లోకి తీసుకోవాలని, లేని పక్షంలో పెద్ద ఎత్తున ఉద్యమిస్తామని హెచ్చరించారు. విద్యుత్ ఉత్పత్తిని నిలిపివేస్తామని కూడా హెచ్చరించారు. కార్మికుల ఆందోళన కొనసాగుతోంది.