క్యాతనపల్లిలో రూ.80 కోట్ల అభివృద్ధి పనులు: మంత్రి వివేక్ వెంకటస్వామి

మంచిర్యాల జిల్లా క్యాతనపల్లిలో రూ.80 కోట్లతో అభివృద్ధి పనులు చేపడుతున్నట్లు రాష్ట్ర మంత్రి వివేక్ వెంకటస్వామి తెలిపారు. మంచిర్యాల అభివృద్ధే తన లక్ష్యమని చెప్పారు.

ఆయన మాట్లాడుతూ, క్యాతనపల్లిలో రూ.4.80 కోట్లతో నిర్మిస్తున్న రహదారి పనులు మూడు నెలల్లో పూర్తవుతాయన్నారు. ఇప్పటికే రూ.80 కోట్లతో వివిధ అభివృద్ధి ప్రాజెక్టులు చేపట్టామని వివరించారు.

కొన్ని కాలనీల్లో ఇంతకు ముందు బిల్డర్లు రోడ్లు, డ్రెయిన్లు వేయకుండా పంచాయతీ అని చెప్పి నిబంధనలు దాటారని, ఇప్పుడు ప్రభుత్వమే వాటిని పూర్తి చేస్తోందని మంత్రి తెలిపారు. ఈ ఏడాది చివరి నాటికి అన్ని కాలనీల్లో సిసి రోడ్లు, పక్క డ్రెయిన్లు 100% పూర్తి చేస్తామని హామీ ఇచ్చారు.

అమృత్ పథకం కింద రూ.40 కోట్లతో నీటి సరఫరా, ఇతర మౌలిక వసతుల పనులు కొనసాగుతున్నాయని, ఇవి కూడా ఈ ఏడాది చివరికి పూర్తిచేసి ప్రతి ఇంటికి నీళ్లు అందిస్తామని చెప్పారు. రాష్ట్ర ప్రభుత్వం నియోజకవర్గాల అభివృద్ధికి నిధులు సమకూరుస్తోందని ఆయన స్పష్టం చేశారు.