కామారెడ్డి జిల్లా బీర్కూర్ గురుకుల పాఠశాలలో 12 మంది విద్యార్థులు అస్వస్థత

కామారెడ్డి జిల్లా బీర్కూర్ మండలంలోని మహాత్మా గాంధీ జ్యోతిబా ఫూలే గురుకుల బాలుర పాఠశాలలో నిన్న మధ్యాహ్నం 12 మంది విద్యార్థులు అస్వస్థతకు గురయ్యారు. ఎగ్ కర్రీతో భోజనం చేసిన కొద్దిసేపటికే వారికి వాంతులు, విరోచనాలు మొదలయ్యాయి.

పాఠశాల సిబ్బంది వారిని వెంటనే బాన్సవాడలోని మాతా శిశు ఆసుపత్రికి తరలించారు. వైద్యుడు క్రాంతి కుమార్ మాట్లాడుతూ.. భోజనం వికటించడం వల్లే విద్యార్థులు అస్వస్థతకు గురైనట్లు ప్రాథమికంగా నిర్ధారించామని, ప్రస్తుతం వారి ఆరోగ్యం నిలకడగా ఉందని, ఎలాంటి ప్రాణాపాయం లేదని తెలిపారు. 12 మందిలో 9 మందికి అడ్మిషన్ అవసరం పడగా, ముగ్గురికి ఓపీ చికిత్స అందించారు.

ఈ ఘటనపై అధికారులు దృష్టి పెట్టి, పాఠశాలలో వండిన ఆహార నమూనాలను పరిశీలిస్తున్నారు. ఆహార నాణ్యతపై ఆరోపణలు రావడంతో విద్యార్థి సంఘాలు, తల్లిదండ్రులు ఆందోళన వ్యక్తం చేశారు. బాధ్యులపై చర్యలు తీసుకోవాలని డిమాండ్ చేస్తున్నారు.