మహబూబ్‌నగర్ సూపర్ స్పెషాలిటీ ఆసుపత్రి ప్రారంభం నిధుల కొరతతో వాయిదా

మహబూబ్‌నగర్ జిల్లా కేంద్రంలో 1000 పడకల సూపర్ స్పెషాలిటీ ఆస్పత్రి నిర్మాణ భవనం పూర్తయినా ప్రారంభం కాలేదు. పరికరాల కొనుగోలుకు నిధులు విడుదల చేయకపోవడంతో ఆస్పత్రి సేవలు అందుబాటులోకి రావడం లేదు.

గత బీఆర్ఎస్ ప్రభుత్వ హయాంలో 1000 కోట్ల అంచనా వ్యయంతో ఈ ప్రాజెక్టు ప్రారంభమైంది. ప్రభుత్వం మారే నాటికి 80 శాతం పనులు పూర్తయ్యాయి. 250 కోట్లతో ఐదు అంతస్తులు, ఐదు బ్లాక్‌ల భవనం రూపొందింది. కానీ ప్రస్తుత కాంగ్రెస్ ప్రభుత్వం వచ్చిన తర్వాత పనులు వేగం తగ్గాయి. వైద్య పరికరాలు, ఆపరేషన్ థియేటర్లు, ఆక్సిజన్ ప్లాంట్లు, బెడ్లు వంటి మౌలిక వసతుల కల్పనకు మరో 500-600 కోట్ల రూపాయలు అవసరం. 3000 మంది సిబ్బంది నియామకం కూడా పెండింగ్‌లో ఉంది.

వైద్యారోగ్య శాఖ మంత్రి దామోదర్ రాజనరసింహ ఈ ఏడాది జూన్ 2న ఆస్పత్రిని ప్రారంభిస్తామని ప్రకటించారు. కానీ గడువు ముగిసినా సాధ్యం కాలేదు. వైద్యశాఖ అధికారులు మాట్లాడుతూ, ప్రస్తుతం ప్రభుత్వం ఇంత పెద్ద మొత్తంలో నిధులు విడుదల చేసే పరిస్థితి లేదని, కనీసం మరో ఏడాది సమయం పట్టవచ్చని అంచనా వేస్తున్నారు.

ఈ ఆస్పత్రిలో గుండె, కిడ్నీ, కంటి, న్యూరో, ఆర్థో, ఈఎన్‌టీ తదితర 35 రకాల విభాగాల్లో చికిత్స అందించనున్నారు. ముఖ్యమంత్రి రేవంత్ రెడ్డి సొంత జిల్లా కావడంతో నిరుపేదలకు మెరుగైన వైద్యం అందుతుందన్న ఆశలు ఉన్నాయి. అయితే ప్రారంభం జాప్యంపై స్థానిక ప్రజలు నిరాశ వ్యక్తం చేస్తున్నారు.