ముంబై-పూణేలో భారీ వర్షం: కొండచరియలు, వరదలు; 7 మంది మృతి

ముంబై, పూణే ప్రాంతాల్లో కురిసిన భారీ వర్షాలకు కొండచరియలు విరిగిపడటంతో రైలు, రోడ్డు రాకపోకలు తీవ్రంగా దెబ్బతిన్నాయి. వరదలు సంభవించాయి. ఈ దుర్ఘటనలో మంఖుర్ద్‌లో భవనం కూలి 6 మంది, కుర్లాలో చెట్టు కూలి ఒక వృద్ధుడు కలిపి మొత్తం 7 మంది ప్రాణాలు కోల్పోయారు.

ఠాకూర్వాడి సమీపంలో, ఖండాల ఘాట్ ప్రాంతంలో కొండచరియలు విరిగిపడి ముంబై-పూణే మార్గంలోని అప్ లైన్, డౌన్ లైన్, మిడిల్ ట్రాక్ సహా మూడు రైల్వే ట్రాక్‌లు దెబ్బతిన్నాయి. దీంతో ఇంద్రాయణి ఎక్స్‌ప్రెస్, ఇంటర్‌సిటీ ఎక్స్‌ప్రెస్, డెక్కన్ ఎక్స్‌ప్రెస్, డెక్కన్ క్వీన్, ప్రగతి ఎక్స్‌ప్రెస్, దూలే ఎక్స్‌ప్రెస్ సహా 16 రైళ్లను రద్దు చేశారు. 9 రైళ్లను దారి మళ్లించారు. కొన్ని రైళ్లను మధ్యలోనే నిలిపివేశారు. మరికొన్నింటి సమయాలను మార్చారు.

ముంబై-పూణే ఎక్స్‌ప్రెస్ వే, పాత జాతీయ రహదారిని మూసివేశారు. విమానాలు ఒక గంట పాటు నిలిచిపోయాయి, చాలా వరకు ఆలస్యంగా నడిచాయి. IMD ముంబైకి ఆరెంజ్ అలర్ట్, పూణేకు రెడ్ అలర్ట్ జారీ చేసింది.

అత్యవసరమైతే తప్ప ముంబై-పూణే మధ్య ప్రయాణాలు చేయొద్దని పోలీసులు సూచించారు. పరిస్థితి అదుపులోకి వచ్చే వరకు ప్రయాణాలు వాయిదా వేసుకోవాలని విజ్ఞప్తి చేశారు. భారీ వర్షాల హెచ్చరికల నేపథ్యంలో ముంబై, పూణే, థానే, పాల్ఘర్ జిల్లాల్లో ప్రభుత్వ, ప్రైవేట్ పాఠశాలలు, కళాశాలలకు సెలవు ప్రకటించారు.