సాయి కృష్ణ కేసు: ఎ4 సురేష్ పరారీ, సిట్ విచారణలో సిఐ నాగరాజు మౌనం

సాయి కృష్ణ కస్టోడియల్ డెత్ కేసులో స్పెషల్ ఇన్వెస్టిగేషన్ టీం (సిట్) మరో ప్రకటన చేసింది. ఈ కేసులో నాలుగో నిందితుడిగా ఉన్న సురేష్ పరారీలో ఉన్నాడని సిట్ అధికారులు తెలిపారు. సురేష్ ఎక్కడ ఉన్నా తమకు సమాచారం ఇవ్వాలని, అతనికి ఎవరూ సహాయం చేయొద్దని సిట్ కోరింది.

సిట్ అధికారులు ఇప్పటికే సీఐ నాగరాజును కస్టడీలోకి తీసుకుని విచారణ చేస్తున్నారు. నాగరాజు నాలుగో రోజు విచారణలో సహకరించడం లేదని, మూడు రోజులుగా నోరు మెదపలేదని సిట్ వర్గాలు తెలిపాయి. కస్టడీ గడువు ముగింపు దగ్గర పడుతుండటంతో, లాకప్ మరణం సమయంలో సీసీటీవీ ఫుటేజ్ ఎందుకు తొలగించారనే దానిపై అధికారులు తీవ్రంగా ప్రశ్నిస్తున్నారు.

ఈ కేసులో మొత్తం ఆరుగురు నిందితులు కాగా, ఐదుగురు ఇప్పటికే అరెస్టయ్యారు. సురేష్ మాత్రం కేసు నమోదైనప్పటి నుంచి పట్టుబడలేదు. ఆయన కోసం ప్రత్యేక బృందాలు గాలింపు చర్యలు చేపట్టినా ఫలితం లేదు. సురేష్‌ను పట్టుకుంటే, నాగరాజుతో కలిపి విచారించే అవకాశం ఉందని సిట్ అధికారులు భావిస్తున్నారు.

విచారణ మరో మూడు రోజులు కొనసాగనుంది. ఈ లోపు సురేష్ దొరికితే ఇద్దరిని ఒకేసారి విచారించే ఆలోచనలో సిట్ ఉంది.