సాయి కృష్ణ లాకప్ డెత్ కేసు: SIT కస్టడీలో మాజీ సీఐ నాగరాజు మౌనం

సాయి కృష్ణ లాకప్ డెత్ కేసులో మాజీ సీఐ నాగరాజు ఏడు రోజుల SIT కస్టడీ ముగిసింది. ఈ వారం రోజుల్లో నాగరాజు SIT అధికారుల ప్రశ్నలకు సరైన సమాధానాలు ఇవ్వలేదు.

SIT విచారణలో నాగరాజు పొడిపొడి సమాధానాలు మాత్రమే ఇచ్చాడు. తనకు సాయి కృష్ణ ఎవరో తెలియదని, నవీన్ రెడ్డి హత్య కేసులో అతను ఉన్నట్టు మాత్రమే తెలుసని చెప్పాడు. సాయి కృష్ణ మిస్సింగ్ కేసులో హెబియస్ కార్పస్ పిటిషన్ ఎందుకు వేశావన్న ప్రశ్నకు మౌనంగా ఉన్నాడు. సాయి కృష్ణను టార్చర్ చేశారా, ఎవరైనా సహకరించారా అనే ప్రశ్నలకు కూడా సమాధానం ఇవ్వలేదు.

SIT అధికారులు విచారణ మొత్తాన్ని ఆడియో, వీడియో రూపంలో రికార్డ్ చేసి కోర్టుకు సమర్పించారు. కస్టడీ ముగిసిన తర్వాత నాగరాజుకు వైద్య పరీక్షలు నిర్వహించి విజయవాడ కోర్టులో హాజరుపరిచారు.

ఈ కేసులో ఆరోపణలు ఎదుర్కొంటున్న ఐదుగురు కానిస్టేబుళ్లను కోర్టు ఐదు రోజుల కస్టడీకి అనుమతించింది. కోర్టు ముందు నాని అనే కానిస్టేబుల్ తనను తీవ్ర ఇబ్బందులకు గురి చేశారని కన్నీళ్లు పెట్టుకున్నాడు. నాగరాజు మౌనంతో కేసు విచారణ మరింత ఆలస్యం అయ్యే అవకాశం ఉంది.