సాయికృష్ణ అదృశ్యం: ప్రత్యేక దర్యాప్తు బృందం ఏర్పాటు, విచారణ మొదలు

విజయవాడ కృష్ణలంకకు చెందిన రౌడీ షీటర్ సాయి కృష్ణ అదృశ్యం కేసు దర్యాప్తు బాధ్యతలను ప్రత్యేక దర్యాప్తు బృందం (SIT) స్వాధీనం చేసుకుంది. IG రవిప్రకాష్ నేతృత్వంలో ఏర్పాటైన ఈ SIT స్వతంత్రంగా విచారణ జరుపుతుంది.

SIT సభ్యులు విజయవాడ చేరుకుని టాస్క్ ఫోర్స్ కార్యాలయం, కృష్ణలంక పోలీస్ స్టేషన్‌ను సందర్శించారు. విజయవాడ పోలీసుల నుంచి కేసు సంబంధిత దస్త్రాలను, స్టేట్‌మెంట్లను స్వీకరించారు. కేసులో ఆరోపణలు ఎదుర్కొంటున్న సస్పెండ్ సీఐ నాగరాజును SIT ప్రశ్నించనుంది.

సాయి కృష్ణను మార్కాపురం నుంచి విజయవాడ తీసుకొచ్చిన ముగ్గురు టాస్క్ ఫోర్స్ సిబ్బంది, ఒక కృష్ణలంక కానిస్టేబుల్‌ను కూడా విచారిస్తారు. SIT ప్రత్యేక కార్యాలయం ఏర్పాటు చేసి, డీఎస్పీలు, ఇన్‌స్పెక్టర్లతో దర్యాప్తు చేస్తోంది.

ఇటీవల సీఐ నాగరాజు సింగ్ నగర్‌లోని స్నేహితుని ఇంటికి మకాం మార్చారు. ఆయనకు మద్దతుగా స్థానికులు గుమిగూడి, ‘గంజాయి ముఠాలను అణచిన నాగరాజును అరెస్ట్ చేయొద్దు’ అని డిమాండ్ చేశారు. కృష్ణలంక సీసీ కెమెరాల దృశ్యాలు ఉన్న హార్డ్ డిస్క్, డీవీఆర్, ఎన్వీఆర్‌లను ఫోరెన్సిక్ బృందం సీజ్ చేసింది. వాటిని ఈ రోజు కోర్టుకు సమర్పించి, ఫోరెన్సిక్ ల్యాబ్‌కు పంపించనున్నారు.