సాయి కృష్ణ లాకప్ డెత్: నలుగురు కానిస్టేబుల్స్ విచారణ; సీఐ నాగరాజుకే అన్నీ తెలుసని వెల్లడి

సాయి కృష్ణ లాకప్ డెత్ కేసులో సిట్ అధికారులు నలుగురు కానిస్టేబుల్స్‌ను ఐదు రోజుల పాటు కస్టడీలో ఉంచి విచారించారు.

అశోక్ కుమార్, జంగం నాని, బాబూరావ్ సామయలతో పాటు మరో కానిస్టేబుల్‌ను సిట్ ప్రశ్నించింది. సుప్రీంకోర్టు ఆదేశాల మేరకు మొత్తం విచారణను ఆడియో, వీడియో రికార్డు చేశారు.

సిట్ బృందం నిందితులకు ఫోటోలు, వీడియో ఫుటేజీ చూపించింది. సాయి కృష్ణ మృతి తర్వాత కుటుంబ సభ్యులతో సెటిల్మెంట్ ప్రయత్నం ఎందుకు చేశారు? సాయి కృష్ణ మేనమామ ఇంటికి ప్రైవేట్ వ్యక్తి సురేష్‌తో కలిసి కారులో ఎందుకు వెళ్లారు? అనే ప్రశ్నలు సంధించారు. మృతదేహాన్ని మాయం చేశారా? ఎవరి ఆదేశంతో సాయి కృష్ణను స్టేషన్‌కు తీసుకొచ్చారు? హెబియస్ కార్పస్ పిటిషన్ గురించి తెలుసా? అని కూడా అడిగారు.

చాలాసేపు మౌనంగా ఉన్న కానిస్టేబుల్స్, చివరకు తమకేమీ తెలియదని, మొత్తం విషయం సీఐ నాగరాజుకే తెలుసని స్టేట్మెంట్ ఇచ్చారు. సిట్ ఈ వివరాలను సేకరించి దర్యాప్తు కొనసాగిస్తోంది.