సాయి కృష్ణ లాకప్ డెత్ కేసు: నాగరాజుపై సిట్ విచారణ, హెబియస్ కార్పస్ పిటిషన్ ఉపసంహరణ వివాదం

సాయి కృష్ణ లాకప్ డెత్ కేసులో ఒకే రోజు రెండు కీలక విచారణలు జరిగాయి. సిట్ కస్టడీలో మాజీ సిఐ నాగరాజును దర్యాప్తు బృందం ప్రశ్నించింది.

మరోవైపు సాయి కృష్ణ తల్లి విజయలక్ష్మి హెబియస్ కార్పస్ పిటిషన్ ఉపసంహరణపై హైకోర్టులో విచారణ జరిగింది.

సిట్ అధికారులు నాగరాజుకు 25 ప్రశ్నలు వేశారు. సాయి కృష్ణను ఏ కేసులో అరెస్ట్ చేశారు, ఎవరి ఆదేశాలతో స్టేషన్‌కు తీసుకొచ్చారు, మార్కాపురం నుంచి విజయవాడకు వచ్చాక ఏం జరిగింది వంటి వివరాలు అడిగారు. నాగరాజు ఎలాంటి సమాధానం చెప్పలేదు, మౌనంగానే ఉన్నారు.

కోర్టులో హెబియస్ కార్పస్ పిటిషన్ ఉపసంహరణ విచారణ సందర్భంగా న్యాయవాది రిత్విక కీలక విషయాలు వెల్లడించారు. పిటిషనర్ విజయలక్ష్మి తెలియకుండానే విత్డ్రా పిటిషన్ దాఖలు చేసినట్టు ఒప్పుకున్నారు. ఖాళీ పేపర్లపై సంతకాలు తీసుకున్నట్టు కోర్టుకు తెలిపారు. విజయలక్ష్మి పాత న్యాయవాది ఎన్ఓసి ఇవ్వలేదని, దీంతో ఆమె కోర్టు జోక్యాన్ని కోరింది.

ఈ పరిణామాలపై హైకోర్టు అసంతృప్తి వ్యక్తం చేసింది. సాయి కృష్ణ మిస్సింగ్ కేసు పిటిషన్ల విచారణలో జరుగుతున్న వరుస పరిణామాలపై కోర్టు ఆగ్రహం వెలిబుచ్చింది.