సాయికృష్ణ కేసు: సిట్ కి మూడు రోజుల విచారణ నివేదిక సమర్పణ, రేపటి నుంచి పూర్తిస్థాయి దర్యాప్తు

గాదె సాయికృష్ణ మిస్సింగ్ కేసులో సిట్ (ప్రత్యేక దర్యాప్తు బృందం) విచారణ వేగవంతం అవుతోంది.

ఐఓ ఏఎస్పీ దైవప్రసాద్ నేతృత్వంలోని బృందం గత మూడు రోజులుగా సేకరించిన వివరాల నివేదికను సిట్ కి సమర్పించింది. ఈ నివేదికలో టెక్నికల్ ఆధారాలు, ఫారెన్సిక్ ఆధారాలు, ఇప్పటివరకు నమోదైన స్టేట్మెంట్లు, సాయికృష్ణ తల్లి విజయలక్ష్మి ఇచ్చిన ఫిర్యాదు, డిజిటల్ ఆధారాలు ఉన్నాయి.

సిట్ చీఫ్ ఐజీ రవిప్రకాష్ ఈ నివేదికపై సమీక్ష నిర్వహించారు. తదుపరి చర్యలపై సిట్ సభ్యులతో సమావేశం ఏర్పాటు చేశారు. కృష్ణలంక పోలీస్ స్టేషన్ కు ఫారెన్సిక్ బృందాలు చేరుకున్నాయి. బాపట్ల జిల్లా అదనపు ఎస్పీ సుధాకర్ కూడా ఈ కేసును పరిశీలిస్తున్నారు.

రేపటి నుంచి నివేదిక ఆధారంగా సిట్ బృందం పూర్తిస్థాయిలో రంగంలోకి దిగనుంది. సస్పెండ్ అయిన కృష్ణలంక ఎస్ఐ నాగరాజుపై కేసు నమోదు కాగా, ఆయనను రేపు అదుపులోకి తీసుకుని విచారించనున్నారు.

మరోవైపు, రాజమండ్రి ఎస్పీ నేతృత్వంలో కూడా ఈ కేసుపై సమాంతర విచారణ జరుగుతోంది. ఈ నెల 29వ తేదీ లోపు కేసుకు సంబంధించిన అన్ని వివరాలు కోర్టు ముందు ఉంచాలని ఆదేశాలు ఉన్న నేపథ్యంలో, ప్రభుత్వం సిట్ ను నియమించింది. ఈ నెల 29 లోపు దర్యాప్తు పూర్తి చేసి నివేదిక సమర్పించాలని సిట్ భావిస్తోంది.