విజయవాడలో సాయి కృష్ణ మిస్సింగ్: తల్లి హైకోర్టులో హెబియస్ కార్పస్ పిటిషన్

విజయవాడ కృష్ణలంక ప్రాంతానికి చెందిన సాయి కృష్ణ అనే వ్యక్తి కనిపించకుండా పోయిన ఘటనలో తల్లి హైకోర్టులో హెబియస్ కార్పస్ పిటిషన్ దాఖలు చేశారు. తన కుమారుడిని కృష్ణలంక పోలీస్ స్టేషన్ సీఐ నాగరాజు అకారణంగా అరెస్ట్ చేసి తీసుకొచ్చారని, ఆ తర్వాత అతని ఆచూకీ లేదని తల్లి ఆరోపిస్తున్నారు.

తన కొడుకును విచారణ పేరుతో పిలిపించిన సీఐ నాగరాజు, తర్వాత 'నీ కొడుకు ఇక రాడు' అని బెదిరించాడని, తన కొడుకును చంపేశారని ఆమె ఆవేదన వ్యక్తం చేస్తున్నారు. సాయి కృష్ణపై గతంలో కొన్ని క్రిమినల్ కేసులు ఉన్నాయని పోలీసులు తెలిపారు. విచారణ నిమిత్తం స్టేషన్కు రప్పించిన తర్వాత అతను ఎక్కడికి వెళ్లాడో తమకు తెలియదని సీఐ నాగరాజు చెబుతున్నారు.

ఈ కేసులో నెల రోజులుగా పోలీసులు పురోగతి సాధించకపోవడంతో హైకోర్టు ఆగ్రహం వ్యక్తం చేసింది. సీపీ రాజశేఖర్ బాబు ప్రత్యేక సమావేశం ఏర్పాటు చేసి సీఐ నాగరాజును వెంటనే విఆర్ విభాగానికి బదిలీ చేశారు. అతనికి మెమో జారీ చేసినట్లు సమాచారం.

ఈ నెల 29వ తేదీన సాయి కృష్ణ జాడపై కోర్టుకు నివేదిక సమర్పించాలని హైకోర్టు పోలీసులను ఆదేశించింది. లేనిపక్షంలో చర్యలు తప్పవని హెచ్చరించినట్లు తెలుస్తోంది.