రెండేళ్లు ఆస్ట్రేలియా జాబ్ నాటకం.. భర్తను చంపి పాతిపెట్టిన భార్య

జామ్నగర్‌లో ఓ మహిళ తన భర్తను హత్య చేసి, రెండేళ్ల పాటు ఆయన ఆస్ట్రేలియాలో ఉద్యోగం చేస్తున్నట్లు కుటుంబాన్ని నమ్మించిన ఘటన బయటపడింది.

పోలీసుల కథనం ప్రకారం, జిగ్నేష్ మావాడియా అనే వ్యక్తిని అతని భార్య పృథ్వి, ఆమె ప్రియుడు నీలేష్ కలిసి హత్య చేశారు. భోజనంలో సైనైడ్ కలిపి చంపిన తర్వాత, GIDC లోని ఒక ఫ్యాక్టరీలో 12 అడుగుల గుంత తవ్వి మృతదేహాన్ని పాతిపెట్టారు.

జిగ్నేష్ ఆస్ట్రేలియా వెళ్లాడని పృథ్వి కుటుంబ సభ్యులకు చెప్పింది. రెండేళ్ల తర్వాత జిగ్నేష్ సోదరుడు ఆస్ట్రేలియా వెళ్లి ఆచూకీ కోసం ప్రయత్నించగా, ఎలాంటి సమాచారం లభించలేదు. దీంతో అతను సిటీ పోలీసులకు ఫిర్యాదు చేశాడు.

విచారణలో పృథ్వి నేరం అంగీకరించింది. పోలీసులు ఫ్యాక్టరీలో తవ్వకాలు జరిపి అస్థిపంజరాన్ని వెలికితీశారు. DNA పరీక్ష కోసం నమూనాలను పంపించారు. నిందితులు ఇద్దరినీ అరెస్టు చేసి జైలుకు తరలించినట్లు పోలీసులు తెలిపారు.