ఇందిరమ్మ ఇళ్ల పథకంలో సైబర్ మోసాల పట్ల అప్రమత్తంగా ఉండాలంటూ సీపీ సజ్జనార్ హెచ్చరిక

హైదరాబాద్ పోలీస్ కమిషనర్ సజ్జనార్ ఇందిరమ్మ ఇళ్ల పథకం లబ్ధిదారులకు సైబర్ మోసాలపై హెచ్చరిక జారీ చేశారు. పథకంలో ముందస్తు డిపాజిట్ చెల్లించే ప్రక్రియ ప్రారంభమైన సమయంలో నేరగాళ్లు మోసాలకు పాల్పడే అవకాశం ఉందన్నారు.

ఈ పథకంలో లబ్ధిదారులు ఇల్లు నిర్మాణానికి రూ.10,000 డిపాజిట్ చెల్లించాలి. దళార్లు, మధ్యవర్తుల జోక్యం లేదని, ఎంపిక ప్రక్రియ పూర్తిగా పారదర్శకంగా జరుగుతుందని సజ్జనార్ స్పష్టం చేశారు. ఇల్లు కేటాయించకపోతే చెల్లించిన సొమ్ము నేరుగా లబ్ధిదారుని బ్యాంకు ఖాతాకు తిరిగి వస్తుంది.

సైబర్ నేరగాళ్లు ఫోన్ కాల్స్, నకిలీ లింకులు, ఏపీకే ఫైళ్లతో మోసం చేస్తారని సీపీ హెచ్చరించారు. "ఇవాళ ఆఖరి తేదీ, వెంటనే డిపాజిట్ చెల్లించకపోతే ఇల్లు రద్దవుతుంది" అని భయపెట్టి నగదు బదిలీ చేయిస్తారని చెప్పారు. వాట్సాప్లో వచ్చే అపరిచిత లింకులు క్లిక్ చేయొద్దని, ఏపీకే ఫైళ్లు ఇన్స్టాల్ చేయొద్దని సూచించారు. AnyDesk, TeamViewer వంటి స్క్రీన్ షేరింగ్ యాప్‌లను డౌన్లోడ్ చేయించి బ్యాంక్ వివరాలు దొంగిలించే ప్రమాదం ఉందన్నారు.

ప్రభుత్వ పోర్టల్లను పోలిన నకిలీ వెబ్సైట్లు సృష్టించి మోసాలు చేస్తారు. అపరిచిత వ్యక్తులకు ఆధార్ కార్డు ఫొటోలు, బ్యాంక్ వివరాలు, ఓటీపీలు పంపవద్దని, అనుమానాస్పద కాల్స్ వస్తే వెంటనే స్థానిక పోలీసులకు సమాచారం ఇవ్వాలని సజ్జనార్ విజ్ఞప్తి చేశారు.