విజయనగరం చిన్నారి సామ్యూల్ బెన్నీ 7 అంతర్జాతీయ రికార్డులు సాధించాడు

విజయనగరానికి చెందిన సామ్యూల్ బెన్నీ అనే రెండేళ్ల బాలుడు ఇప్పటికే ఏడు అంతర్జాతీయ రికార్డులు సాధించాడు. హరిబాబు, సత్య దంపతుల కుమారుడైన సామ్యూల్ 14 నెలల వయసులోనే తన ప్రతిభను చూపించడం మొదలుపెట్టాడు.

ఇండియా బుక్ ఆఫ్ రికార్డ్స్, ఇంటర్నేషనల్ బుక్ ఆఫ్ రికార్డ్స్, నోబెల్ వరల్డ్ రికార్డ్స్, ఏషియన్ బుక్ ఆఫ్ రికార్డ్స్, కలాం వరల్డ్ రికార్డ్స్ లాంటి సంస్థల నుంచి సామ్యూల్ అవార్డులు అందుకున్నాడు. ఏషియన్ బుక్ నుంచి గ్రాండ్ మాస్టర్ టైటిల్ కూడా వచ్చింది.

సామ్యూల్ వితౌట్ పెడల్ సైకిల్, స్కేటింగ్ లాంటి వాటిలో అనేక విన్యాసాలు చేయగలడు. బ్రేకులు లేని సైకిల్ మీద కాళ్లతో బ్యాలెన్స్ చేస్తూ వేగంగా వెళ్లడం, కాళ్లు పైకెత్తడం, స్కేటింగ్ స్టంట్స్ చేయడం ఇతని ప్రత్యేకత.

తల్లిదండ్రులు మాట్లాడుతూ సామ్యూల్ చిన్నప్పటి నుంచి సైకిల్ బ్యాలెన్సింగ్, కిటికీలు ఎక్కడం చేసేవాడని చెప్పారు. ఫోన్లు ఇవ్వకుండా ఫిజికల్ యాక్టివిటీస్ మీద దృష్టి పెట్టామని, పిల్లలకు మొబైల్ ఫోన్లకు బదులు శారీరక కార్యకలాపాలు నేర్పించాలని సూచించారు. భవిష్యత్తులో మరిన్ని రికార్డులు సాధించడానికి సామ్యూల్‌కు సహాయం చేస్తామని తెలిపారు.