సముద్ర మంథన్ కార్యక్రమంలో ఆంధ్రప్రదేశ్కు ప్రాధాన్యం ఇవ్వాలని టీడీపీ ఎంపీ సానా సతీశ్ కేంద్రానికి విజ్ఞప్తి

రాజ్యసభ సభ్యుడు సానా సతీశ్ (TDP) కేంద్ర పెట్రోలియం, సహజ వాయువు మంత్రిత్వ శాఖ కన్సల్టేటివ్ కమిటీ సమావేశంలో "సముద్ర మంథన్" ఆఫ్షోర్ అన్వేషణ కార్యక్రమంలో ఆంధ్రప్రదేశ్ కు ప్రాధాన్యం ఇవ్వాలని కేంద్రానికి విజ్ఞప్తి చేశారు. ఈ సమావేశానికి కేంద్ర మంత్రి హరదీప్ సింగ్ పురి అధ్యక్షత వహించారు.

సానా సతీశ్ ఈ సమావేశంలో పలు డిమాండ్లు చేశారు. ఆంధ్రప్రదేశ్ సముద్రతీరం దేశంలోనే ప్రధానమైన ఆఫ్షోర్ ఇంధన వనరుల ప్రాంతమని ఆయన పేర్కొన్నారు. రాష్ట్రంలో నౌకాశ్రయాలు, పారిశ్రామిక మౌలిక సదుపాయాలు, నైపుణ్యం కలిగిన మానవ వనరులను ఉపయోగించి ఆయిల్ అండ్ గ్యాస్ తయారీ జోన్ ఏర్పాటు చేయాలని కోరారు. తీరప్రాంత యువతకు ప్రత్యేక నైపుణ్యాల కోసం ఆఫ్షోర్ స్కిల్ ట్రైనింగ్ సెంటర్ ఏర్పాటు చేయాలని సూచించారు.

అలాగే కృష్ణా-గోదావరి బేసిన్ లోని డీప్ వాటర్ వెల్స్ ద్వారా లభించే ఆదాయంలో నిర్దిష్ట వాటా రాష్ట్రానికి ఇవ్వాలని కోరారు. కాకినాడ లేదా విశాఖలో కామన్ ఆఫ్షోర్ ఇన్ఫ్రాస్ట్రక్చర్ హబ్ ఏర్పాటు చేసి, ఉత్పత్తి, ప్రాసెసింగ్, రవాణా కార్యకలాపాలకు కేంద్రంగా అభివృద్ధి చేయాలని సానా సతీశ్ విజ్ఞప్తి చేశారు. సముద్ర మంథన్ కార్యక్రమం ద్వారా ఏర్పడే ఉద్యోగాల్లో తీరప్రాంత యువతకు ప్రాధాన్యత ఇవ్వాలని కూడా ఆయన అన్నారు.

ఆంధ్రప్రదేశ్ కు 974 కిలోమీటర్ల పొడవైన సముద్రతీరం, అపార సహజ వనరులు కలిగిన కేజీ బేసిన్, ప్రపంచ స్థాయి పోర్టులు, పారిశ్రామిక సామర్థ్యం ఉన్నాయని సానా సతీశ్ కమిటీకి తెలిపారు. ఈ అంశాలే రాష్ట్రాన్ని దేశంలోని ప్రధాన ఆఫ్షోర్ ఎనర్జీ హబ్‌గా మార్చడానికి దోహదం చేస్తాయని వివరించారు. సముద్ర మంథన్ ద్వారా ఇంధన రంగంలోనే కాకుండా పారిశ్రామిక అభివృద్ధి, పెట్టుబడులు, ఉపాధి కల్పనలో కూడా ఆంధ్రప్రదేశ్ దేశానికి ఆదర్శంగా నిలుస్తుందని ఆయన ఆశాభావం వ్యక్తం చేశారు.