గంటల్లోనే తప్పిపోయిన రూ.4 లక్షల నగదు రికవరీ చేసిన సంగం పోలీసులు

అనంతపురం జిల్లా ధర్మవరం గ్రామానికి చెందిన కంచర్ల భవాని తన అల్లుడికి ఇవ్వడానికి రూ.4 లక్షల నగదును బ్యాగులో పెట్టుకుని ప్రయాణించారు. బద్వేల్ నుంచి నెల్లూరు వెళ్లే ఆర్టీసీ బస్సులో ఆమె ప్రయాణిస్తుండగా, బుచ్చిరెడ్డి పాలం వద్ద బ్యాగు కనిపించకపోవడంతో ఆందోళన చెందారు.

సంగం వద్ద దిగిన కొందరు ప్రయాణికులు తమ సామానుతో పాటు ఆ బ్యాగును పొరపాటున తీసుకెళ్లి ఉండవచ్చని భావించిన భవాని, ఆర్టీసీ సిబ్బందికి సమాచారం ఇచ్చారు. వారి సూచనతో సంగం పోలీస్ స్టేషన్లో ఫిర్యాదు చేశారు.

పోలీసులు ఆమె ప్రయాణ టికెట్ ఆధారంగా దర్యాప్తు ప్రారంభించి, కొద్దిసేపట్లోనే సంగం ప్రాంతంలో ఓ బ్యాగును గుర్తించారు. అది తనదేనని భవాని నిర్ధారించగా, బ్యాగులో నగదు అలాగే ఉంది. పోలీసులు ఆ నగదును భవానికి సురక్షితంగా అప్పగించారు. ఆమె పోలీసులకు కృతజ్ఞతలు తెలిపారు.