సంగారెడ్డిలో వాయు కాలుష్యం తీవ్రం: AQI 146-180 మధ్య నమోదు, దీపావళి రోజు 500 దాటింది

సంగారెడ్డి జిల్లాలో వాయు కాలుష్యం తీవ్రంగా పెరుగుతోంది. జిల్లాలో ఎయిర్ క్వాలిటీ ఇండెక్స్ (AQI) 146 నుంచి 180 మధ్య నమోదవుతోంది. దీపావళి రోజున ఇది 500 మార్కును దాటింది. కొన్ని రోజుల్లో ఇక్కడి గాలి నాణ్యత ఢిల్లీ స్థాయిలో నమోదవుతోంది.

పటాన్‌చేరు, పాసమైలారం, జిన్నారం, బొల్లారం, హత్నూరు తదితర పారిశ్రామిక ప్రాంతాల్లో రాత్రిపూట కాలుష్యం మరింత ఎక్కువగా ఉంటోంది. జిల్లాలోని సగం మండలాల్లో బల్క్ డ్రగ్, రసాయన పరిశ్రమలు ఉన్నాయి. ఈ పరిశ్రమల పొగ, భారీ ట్రక్కుల రద్దీ వల్ల కాలుష్యం పెరుగుతోందని తెలుస్తోంది.

ఐఐటీ హైదరాబాద్ పరిసరాలు, గుమ్మడిదల తదితర ప్రాంతాల్లోనూ గాలి నాణ్యత బాగా పడిపోయింది. పరిసర వ్యవసాయ ప్రాంతాల్లో పంట వ్యర్థాలను కాల్చడం కూడా కాలుష్యాన్ని పెంచుతోంది.

గాలి నాణ్యత పడిపోవడంతో పిల్లలు, వృద్ధులు శ్వాసకోస సమస్యలతో ఇబ్బంది పడుతున్నారు. ఉదయం, సాయంత్రం నడకకు వెళ్లకపోవడమే మంచిదని వైద్యులు సూచిస్తున్నారు. బయటకు వెళ్లాల్సి వస్తే మాస్కులు ధరించాలని, ఇళ్లలో తలుపులు, కిటికీలు మూసి ఉంచాలని చెబుతున్నారు.

కాలుష్యాన్ని నియంత్రించేందుకు పొల్యూషన్ కంట్రోల్ బోర్డు అధికారులు తగిన చర్యలు తీసుకోవడం లేదని విమర్శలు వస్తున్నాయి. రాత్రిపూట పరిశ్రమల నుంచి వెలువడే ఉద్గారాలను తగ్గించాలని, పరిశ్రమలకు నోటీసులు జారీ చేయాలని డిమాండ్ ఉంది.