పంచాయతీ ఎన్నికలకు పూర్తి ఏర్పాట్లు: ఎస్ఈసీ అనిల్ చంద్ర పునేత

పంచాయతీ ఎన్నికలకు పూర్తి స్థాయిలో ఏర్పాట్లు చేశామని రాష్ట్ర ఎన్నికల కమిషనర్ అనిల్ చంద్ర పునేత తెలిపారు. శాంతిభద్రతలకు అధిక ప్రాధాన్యం ఇస్తున్నామని ఆయన చెప్పారు. ఎన్నికలు ప్రశాంత వాతావరణంలో జరిగేలా చూడాలని పోలీసులను ఆదేశించినట్లు పేర్కొన్నారు.

స్థానిక పరిషత్ ఎన్నికల్లో పల్నాడు నుంచి రాయలసీమ వరకు కొన్ని ప్రాంతాల్లో ఘర్షణలు జరిగినట్లు ఆయన తెలిపారు. 12 జిల్లాల పరిస్థితిపై సమీక్షించామని, ఆయా జిల్లాల ఎస్పీల నుంచి నివేదికలు తీసుకున్నామని చెప్పారు. కలెక్టర్లు, ఎస్పీలతో వీడియో కాన్ఫరెన్స్ నిర్వహించినట్లు ఆయన వివరించారు.

పోలింగ్ స్టేషన్లలో వ్యవస్థ పకడ్బందీగా ఉండాలని ఆయన అన్నారు. పోలింగ్ సిబ్బంది, మెటీరియల్, బ్యాలెట్ పేపర్లు సకాలంలో చేరాలని చెప్పారు. లా అండ్ ఆర్డర్ బాగుంటే అభ్యర్థులు నామినేషన్లు వేయగలరు, ఓటర్లు స్వేచ్ఛగా ఓటు వేయగలరని ఆయన పేర్కొన్నారు.

ఏకగ్రీవంగా ఎన్నికైన గ్రామాలకు ప్రభుత్వం ప్రోత్సాహక నిధులు ఇస్తోందని ఆయన తెలిపారు. పోలీసు వ్యవస్థ అందరికీ సమానంగా వ్యవహరించాలని ఆయన సూచించారు.