ఏలూరు జీలుగుమిల్లిలో పెద్దపులి సంచారం.. గ్రామాలకు అధికారుల హెచ్చరిక

ఏలూరు జిల్లా జీలుగుమిల్లి మండలంలో పెద్దపులి సంచారం కలకలం రేపుతోంది. బొత్తప్పగూడెం సమీపంలోని సంఘం వాగు అటవీ ప్రాంతంలో పులి మకాం వేసినట్టు అటవీ శాఖ అధికారులు గుర్తించారు.

జిల్లేలగూడెం సమీపంలో పులి చంపిన ఎద్దును రాత్రి సమయంలో మరోసారి తిన్నట్టు అధికారులు తెలిపారు. ఆ తర్వాత పులి సంఘం వాగు వైపు వెళ్లినట్టు గుర్తించారు.

పులి మెడలోని రేడియో కాలర్ ద్వారా దాని కదలికలను అధికారులు నిరంతరం పర్యవేక్షిస్తున్నారు. పరిసర గ్రామాల ప్రజలు అప్రమత్తంగా ఉండాలని హెచ్చరికలు జారీ చేశారు.

పులి ఇంకా పట్టుబడలేదని, అది తుప్పల్లో ఉండి ఉంటుందని స్థానికులు భావించారు. తెల్లవారుజామున పశువుపై జరిగిన దాడిని వారు గుర్తించారు. పొలాలకు వెళ్లాలంటేనే స్థానికులు భయపడుతున్నారు.