పంచాయతీ ఎన్నికల భద్రతపై ఎస్ఈసీ సమీక్ష: రాయలసీమ 12 జిల్లాల ఎస్పీలతో భేటీ

పంచాయతీ ఎన్నికల భద్రతా ఏర్పాట్లపై రాష్ట్ర ఎన్నికల కమిషనర్ అనిల్ చంద్ర పునేట తిరుపతి కలెక్టరేట్‌లో రాయలసీమలోని 12 జిల్లాల ఎస్పీలతో సమావేశం నిర్వహించారు. ఎన్నికల నిర్వహణ, భద్రతపై ఈ భేటీలో సమీక్ష చేశారు.

సమస్యాత్మక పోలింగ్ కేంద్రాల గుర్తింపుపై సమావేశంలో చర్చించారు. అవసరమైన ప్రాంతాల్లో అదనపు పోలీసు బలగాలు మోహరించాలని నిర్ణయించారు. ఎన్నికల ప్రవర్తనా నియమావళి అమలుపై పోలీస్ అధికారులకు దిశానిర్దేశం చేశారు.

లా అండ్ ఆర్డర్ అదనపు డీజీ మధుసూదన్ రెడ్డి సమావేశానికి హాజరయ్యారు. అనంతపురం ఐజీ షేమూషి వాజ్‌పాయి, డీఐజీ కోయ ప్రవీణ్, తిరుపతి ఎస్పీ సుబ్బారాయుడు, చిత్తూరు ఎస్పీ తుషార్ డూడి, అన్నమయ్య ఎస్పీ ధీరజ్ పాల్గొన్నారు. మిగిలిన జిల్లాల ఎస్పీలు, కొంతమంది కలెక్టర్లు, ఎన్నికల అధికారులు జూమ్ ద్వారా హాజరయ్యారు.

గత మున్సిపల్ కార్పొరేషన్, ఎంపీటీసీ, జెడ్పీటీసీ ఎన్నికల్లో రాయలసీమలో జరిగిన హింసాత్మక ఘటనలపై సమావేశంలో సమీక్ష చేశారు. పులివెందుల, రాయచోటి, పుంగనూరు, కడప ఘటనలపై వైసీపీ ఫిర్యాదులు అందాయి. చిత్తూరు, కడప, అనంతపురం, కర్నూలు ప్రాంతాల్లో కొన్ని అత్యంత సమస్యాత్మక ప్రాంతాలున్నట్లు గుర్తించారు.

గత ఎన్నికల్లో జరిగిన గొడవలు పంచాయతీ ఎన్నికల్లో పునరావృతం కాకూడదని ఎస్ఈసీ ఆదేశించారు. నామినేషన్ దశ నుంచి పోలింగ్, కౌంటింగ్ వరకు తీసుకోవాల్సిన చర్యలపై సూచనలు జారీ చేశారు. ఈ చర్చ దాదాపు రెండు నుంచి మూడు గంటలు కొనసాగింది. సాయంత్రం మీడియా సమావేశం నిర్వహించి మరిన్ని ఆదేశాలు ఇచ్చే అవకాశం ఉంది.