ఏపీలో జీవన్దాన్: 506 మంది దాతల నుంచి 1,616 అవయవాలు సేకరణ

ఆంధ్రప్రదేశ్ ప్రభుత్వం నిర్వహిస్తున్న జీవన్దాన్ కార్యక్రమంలో ఇప్పటివరకు 506 మంది దాతల నుంచి 1,616 అవయవాలు సేకరించారు. బ్రెయిన్ డెడ్ అయిన రోగుల నుంచి అవయవాలు తీసి, ప్రాణాపాయ స్థితిలో ఉన్న రోగులకు అమర్చడమే ఈ కార్యక్రమం లక్ష్యం. మానవ అవయవ మార్పిడి చట్టం 1994 ప్రకారం ఈ పథకం అమలవుతోంది.

2010లో ఉమ్మడి రాష్ట్రంలో హైదరాబాద్ కేంద్రంగా ఈ కార్యక్రమం ప్రారంభమైంది. రాష్ట్ర విభజన తర్వాత 2015 మార్చి 18 నుంచి జీవన్దాన్ ఆంధ్రప్రదేశ్ పేరుతో విజయవాడ కేంద్రంగా సేవలు అందిస్తోంది. ప్రస్తుతం ఇది DME పర్యవేక్షణలో పనిచేస్తోంది.

రాష్ట్రంలో ఇప్పటివరకు 3,510 కిడ్నీ, 59 లివర్ మార్పిడులు జరిగాయి. జీవన్దాన్, లైవ్ డొనేషన్ల ద్వారా 4,400 మందికి పైగా శస్త్రచికిత్సలు నిర్వహించారు. విశాఖపట్నం, విజయవాడ, తిరుపతి నగరాల్లో ఈ సేవలు అందుబాటులో ఉన్నాయి.

రాష్ట్రంలో ప్రభుత్వ, ప్రైవేట్ రంగాన్ని కలిపి 85 ఆర్గన్ ట్రాన్స్‌ప్లాంటేషన్ సెంటర్లు ఉన్నాయి. వీటిలో తొమ్మిది ప్రభుత్వ ఆసుపత్రుల్లో ఉండగా, మిగతావి ప్రైవేట్‌లో ఉన్నాయి. ఏడు నాన్ ట్రాన్స్‌ప్లాంటేషన్ ఆర్గన్ హార్వెస్టింగ్ సెంటర్లు ప్రభుత్వ జనరల్ ఆసుపత్రుల్లోనే ఉన్నాయి. NIC భాగస్వామ్యంతో కొత్త జీవన్దాన్ AP డిజిటల్ వెబ్ అప్లికేషన్ అందుబాటులోకి తెచ్చారు.

జీవన్దాన్ అధికారిక వివరాల ప్రకారం రాష్ట్రవ్యాప్తంగా 6,281 మంది రోగులు అవయవాల కోసం ఎదురుచూస్తున్నారు. వీరిలో 3,000 మందికి పైగా కిడ్నీ కోసం వేచి ఉన్నారు. లివర్, గుండె, ఊపిరిత్తుల కోసం దరఖాస్తు చేసుకున్న వారి సంఖ్య కూడా గణనీయంగా ఉంది.

దాతల కుటుంబాలను గౌరవించేందుకు ప్రభుత్వం అధికారిక లాంఛనాలతో నివాళి అర్పిస్తోంది. జిల్లా కలెక్టర్ లేదా ఉన్నత అధికారులు స్వయంగా హాజరై కుటుంబ సభ్యులను సత్కరిస్తున్నారు. అంత్యక్రియల కోసం ₹10,000 ఆర్థిక సహాయం అందజేస్తున్నారు. ప్రతి ప్రధాన ఆసుపత్రిలో ప్రత్యేక కోఆర్డినేటర్లను నియమించారు.

2025-26 సంవత్సరంలో రికార్డు స్థాయిలో అవయవదానం జరిగిందని వైద్యశాఖ అధికారులు తెలిపారు. ప్రభుత్వ ఆసుపత్రుల్లో ఉచిత అవయవ మార్పిడి సౌకర్యాలను మరింత బలోపేతం చేయనున్నారు. పెరుగుతున్న వెయిటింగ్ లిస్టును తగ్గించి, బాధితులకు త్వరగా శస్త్రచికిత్సలు పూర్తి చేయడమే లక్ష్యమని అధికారులు చెప్తున్నారు.