జారసంఘం SI వృద్ధురాలిని అడవిలో వదిలేశారని ఆరోపణ — సంగారెడ్డి పోలీసులకు మరో వివాదం

సంగారెడ్డి జిల్లాలో జారసంఘం మండలం ఎల్గోయి గ్రామానికి చెందిన నరసమ్మ (75) పొలానికి వెళ్తుండగా దుండగులు ఆమెను బెదిరించి బంగారు గొలుసు, చెవి దుద్దులు లాక్కుపోయారు.

ఈ విషయంపై నరసమ్మ జారసంఘం పోలీస్ స్టేషన్‌లో SI క్రాంతి పాటీల్‌కు ఫిర్యాదు చేశారు. శరీరంపై గాయాలు లేవని SI ఆమెను ప్రశ్నించారు. తర్వాత విచారణ నిమిత్తం పోలీస్ వాహనంలో చోరీ జరిగిన ప్రదేశానికి తీసుకెళ్లారు.

ఆ తర్వాత నరసమ్మను అక్కడే వదిలేసి SI వాహనంలో వెళ్లిపోయారని ఆమె ఆరోపించారు. ఈ విషయం గ్రామస్థులకు తెలియడంతో వారు జారసంఘం పోలీస్ స్టేషన్ ముందు, జహీరాబాద్ రోడ్డుపై నిరసన తెలిపారు. SI క్రాంతి పాటీల్‌తో గ్రామస్థులు వాగ్వాదానికి దిగారు.

ఇది జరగడానికి రెండు రోజుల ముందు కొండాపూర్ పోలీస్ క్వార్టర్స్‌లో ఓ కానిస్టేబుల్ నిందితుడి బంధువుతో మద్యం తాగుతున్న ఘటన కూడా వెలుగులోకి వచ్చింది. రెండు ఘటనలతో సంగారెడ్డి జిల్లా పోలీసులు వివాదాల్లో చిక్కుకున్నారు.

SI క్రాంతి పాటీల్ ఆరోపణలపై పోలీస్ విభాగం స్పందన తెలియాల్సి ఉంది.