హైదరాబాద్‌లో సర్దార్ వల్లభాయ్ పటేల్ 150వ జయంతి వేడుకలు

హైదరాబాద్ ఎగ్జిబిషన్ గ్రౌండ్స్‌లో సర్దార్ వల్లభాయ్ పటేల్ 150వ జయంతిని ఘనంగా నిర్వహించారు.

ఈ కార్యక్రమాన్ని భారత భారతి హైదరాబాద్ శాఖ నిర్వహించింది. కేంద్ర పర్యాటక, సాంస్కృతిక శాఖ మంత్రి గజేంద్ర సింగ్ షెకావత్ ముఖ్య అతిథిగా పాల్గొన్నారు.

మంత్రి మాట్లాడుతూ, స్వాతంత్ర్యం అనంతరం 562 రాజ సంస్థానాలను ఏకం చేసి, అటక్ నుంచి కటక్ వరకు, కాశ్మీర్ నుంచి కన్యాకుమారి వరకు, లక్షదీప్ నుంచి అండమాన్ వరకు విస్తరించిన భారతాన్ని ఒక దేశంగా నిలిపిన ఘనత సర్దార్ పటేల్‌కు చెందుతుందని కొనియాడారు. అప్పట్లో ఆర్థిక వ్యవస్థ బలహీనంగా ఉండి, రాజ సంస్థానాల ఏకీకరణే అతి పెద్ద సవాలుగా ఉన్నప్పటికీ, ఆయన విజయం సాధించారని చెప్పారు.

పటేల్ కారణంగానే భారతదేశం ప్రపంచంలోనే అత్యంత పురాతన ప్రజాస్వామ్య వ్యవస్థగా, అతిపెద్ద ప్రజాస్వామ్యంగా నిలిచిందని మంత్రి అన్నారు.