35 ఏళ్ల తర్వాత సరళా భట్ హత్య కేసులో చార్జ్‌షీట్ దాఖలు

1990 ఏప్రిల్ 18న శ్రీనగర్‌లోని SKIMS ఆసుపత్రిలో నర్సుగా పనిచేస్తున్న సరళా భట్ అనే కాశ్మీరీ పండిట్ యువతి అపహరణకు గురై, ఆ తర్వాత అత్యాచారం, హత్య చేయబడింది. 35 ఏళ్ల తర్వాత ఈ కేసులో జమ్మూకాశ్మీర్ స్టేట్ ఇన్వెస్టిగేషన్ ఏజెన్సీ (SIA) చార్జ్‌షీట్ దాఖలు చేసింది.

JKLF ఉగ్రవాదులు తమ బెదిరింపులను లెక్కచేయకుండా ఆమె ఉద్యోగం కొనసాగించడంతో ఆమెను లక్ష్యంగా చేసుకున్నారు. భద్రతా బలగాలకు ఇన్ఫార్మర్ అని ఉగ్రవాదులు ప్రచారం చేసినా, అది వాస్తవం కాదని దర్యాప్తు సంస్థలు నిర్ధారించాయి. హత్యానంతరం నమోదైన కేసు దశాబ్దాలపాటు నత్తనడకన సాగింది.

2024లో లెఫ్టినెంట్ గవర్నర్ మనోజ్ సిన్హా ఆదేశాలతో ఈ కేసును SIA కు బదిలీ చేశారు. ఏడాది పాటు సాగిన దర్యాప్తులో సాక్షులు, ఫారెన్సిక్, బాలిస్టిక్, వైద్య ఆధారాలు, డాక్యుమెంటరీ సాక్ష్యాలు సేకరించారు. 2025 ఆగస్టులో శ్రీనగర్‌లో ప్రత్యేక న్యాయస్థానంలో 737 పేజీల చార్జ్‌షీట్ దాఖలైంది.

చార్జ్‌షీట్‌లో జైల్లో ఉన్న JKLF చీఫ్ యాసిన్ మాలిక్, కుర్షీద్ అహ్మద్ చల్లుతో పాటు మరో ముగ్గురు JKLF ఉగ్రవాదులు అబ్దుల్ హమీద్ షేక్, గులాం అహ్మద్ తఫ్లు, మొహమ్మద్ యూసఫ్ అలియాస్ ఇద్రీస్‌లను నిందితులుగా పేర్కొన్నారు. వీరిలో అబ్దుల్ హమీద్ షేక్, గులాం అహ్మద్ తఫ్లు, మొహమ్మద్ యూసఫ్ మరణించారు. యాసిన్ మాలిక్, కుర్షీద్ అహ్మద్ చల్లు విచారణ ఎదుర్కొంటున్నారు. 1990లో కాశ్మీర్ పండిట్‌లపై జరిగిన హింసలో ఇది కీలకమైన కేసుగా భావిస్తున్నారు.